INTSHA YAKWADUKUZA ISUKUMELA UMONAKALO
KUSHAQEKE intsha yosomabhizinisi baKwaDukuza ukubona umonakalo odalwe ngabantu abamnyama emabhizinisini abantu abamnyama, emuva kwezibhelu ezisuswe ngabalandeli bakaMnu Jacob Zuma, zagcina sezingenwa yizigilamkhuba ebezintshontsha, zishisa izakhiwo ngeledlule.
UMnu Zuma wagwetshwa izinyanga ezi-wu-15 yiNkantolo yoMthethosise-kelo ngecala lokuyedelela.
Umonakalo odalelike ushaqe iKwaDukuza Municipality Youth Business Forum (KDMYBF), yasukuma yakubeka emhlombe ayo ukulekelela osomabhizinisi abangaphansi kukaMasipala wakwaDukuza, abashayekile kulolu dungunyane.
Ekhuluma neLANGA uMnu Menzi Zulu, oyisekela-sihlalo kwiKDMYBF, uthe bashaqekile bebona umonakalo owenziwe ngabantu abamnyama emabhizinisini abamnyama futhi bewazi kahle ukuthi ngawobani.
Uthe ngesikhathi behambela lezi zindawo - okubalwa kuzona iThethe, iThembeni, iMelville nedolobha laKwaDukuza - bafike kwenye i-Internet Cafe yowesifazane omnyama kushaqwe wonke amakhompyutha nezigayo (printers) abakusebenzisa ukusiza umphakathi.
“Indawo abesebenzela kuyona isale iyihholo. Umonakalo odalekie uthi uma ewubala ungaphezulu kuka-R100 000. Yize amakhompyutha akhe abekhaviwe ngomshwalense, kodwa nathi sizozama ukumsiza ngokulekelelwa wumasipala njengoba nawo useseka kulokhu esikwenzayo.
"Omunye owesilisa odayisa izithelo emgwaqweni, bathathe izambulela zakhe, babulala ngisho amapulangwe abeka kuwona izithelo.
"Besesihlele ukuthi yena sizomsiza ngokukhulu ukuphuthuma njengoba engenawo umshwalense - simthengele ama-gazebo amabili nezingqwembe ezisezingeni elifanele azobhala kuzo izipesheli anazo, simnike impahla azovusa ngayo umsebenzi namatafula kwazise awakhe acekeleke phansi.
"Sidlulele eThembeni lapho kusebenzela khona udokotela ontshontshelwe ngisho imigqomo yokulahla imijovo neyokufaka amagazi.
"Le migqomo ubenovalo lokuthi ingase ithengwe ngogogo bafake kuyona impuphu ekubeni kade iphethe izinto ezibucayi kanjena,” kusho uMnu Zulu.
Uthi badlulele kwaShoprite USave oqashe abantu abawu-40, khona kucekelwe phansi yonke into esemashalofini.
Utshele ILANGA ukuthi njengoba besazohlangana nomasipala, bakholwa wukuthi kukhona abazolekelwa ngakho ukusiza labo abakhahlamezile njengoba noNdunankulu KwaZulu-Natal (uMnu Sihle Zikalala) ememezele ukuthi kukhona iKZN Youth Fund ebekelwe ukusiza osomabhizinisi.