ISIQALILE IMIZAMO YOKUVUSELELA IZITOLO ZAKWA-BOXER
ISIQALILE imizamo yokuvuselela izitolo zakwaBoxer ezicekelwephansi yizigilamkhuba ngesikhathi kunezibhelu ezihambisana nokwebiwa kwempahla nokushiswa kwezakhiwo ngesonto eledlule KwaZulu-Natal naseGauteng, okuholele ekutheni zivalwe ezinye zalezi zitolo.
Seziqalile izinhlelo zokuvusela izitolo zakwaBoxer - ezihamba phambili ngokuba namanani aphansi - ngokuthi kugcwaliswe impahla futhi zivulwe kabusha emuva kwalezi zidubedube.
AbakwaBoxer bathembise ukuthi bazoqhubeka nokuhlinzekela amakhasimende abo ngezidingo futhi bazohlala beyizingqwele emiphakathini abakuyona.
UMnu Marek Masojada oyi-executive manager kwaBoxer, uthe nakuba iNingizimu Afrika ibhekene nezingqinamba ekubeni nabo babhekene nezabo, kodwa bazoqhubeka nokuphokophela phambili. “Ukugcwalisa impahla futhi sivule kabusha izitolo ezithintekile, yikhona okuseqhulwini kithina,” kusho uMnu Masojada.
Uthe lesi sitolokazi - esisanda kuqhuba umkhankaso obeyimpumelelo wokugomela iCoronavirus ngokubambisana noMnyango wezeMpilo - sibona ukuthi nakuba kubuhlungu okwenzekile futhi kungeke kuvele kukhohlakale nje, kodwa bazoqhubeka nokunakelela amakhasimende abo. “Ngeke siliphose ithawula. Kunesizathu sokuthi kungani uBoxer ungu-ngqa phambili emphakathini. Inhloso wukuhlinzekela amakhasimende ethu athembekile ngezidingo njengoba sike sabona amakhulu abantu etheleka ezitolo zethu ukuzosisiza sihlanze ukuze silungiselele ukuvula.
"Kuyasijabulisa ukuthola usizo olungaka oluqhamuka kubantu abafuna ukusibona siqhubeka nokuba yisitolo sabo," kusho uMnu Masojada.
Uveze ukuthi uBoxer ngesinye sezitolo ezishayeke kakhulu kulezi zibhelu, kodwa ukubambisana nokubumbana okubonakalayo, kwenza kungazweli kakhulu okubehlele uma kuqhathaniswa nezinye izitolo.
“Esibambisene nabo sebephakamise izandla, bakhombisa ukuba ngabaholi, ikakhulukazi kulezi eziseGauteng naKwaZulu-Natal.
"Bonke abantu basebenza ngokuzikhandla ukuqinisekisa ukuthi senza umehluko. Kuyasithokozisa ukwesekwa ngamakhasimende ethu asamukela ngokumoyizela nezinyembezi zenjabulo. "Amathimba ethu abongwa yimiphakathi njengoba siqhubeka nokwakha nokuvula kabusha izitolo zethu,” kusho yena.