Ubumbano bevikela amadolobha abo
Umphakathi uthi ubugada ubusuku nemini, usizwa nangabezokuphepha ukuba izitolo zingagqekezwa
BABABAZA ukubambisana nezinhlaka ezahlukene abaholi bomasipala abanamadolobha asindile ezibhelwini ezaqutshulwa ngabalandeli kabaMnu Jacob Zuma emuva kokuzinikela kwakhe ejele njengoba wagwetshwa yiNkantolo yoMthethosisekelo izinyanga eziwu-15 ngokuyedelela.
Sekuwumlando ukuthi impi yabalandeli bakaMnu Zuma yagcina iphuma esandleni, yangenelwa nayinhlese yobugebengu abantu bezitapela ezitolo, ezinye zashiswa KwaZulu-Natal naseGauteng.
Omasipala abasindile kulolu dungunyane babonga ukubambisana phakathi kwabo, amalungu omphakathi, osomabhizinisi, abezokuphepha ngisho nabemboni yamatekisi imbala.
Izigameko zokuzitapela impahla kulinyazwe izakhiwo, zenzeke kakhulu ezindaweni ezisemadolobheni ngisho nasezindaweni ezisemakhaya - kodwa umonakalo omkhulu wenzeke eThekwini njengoba kunezindawo eziningi ezishisiwe.
Emadolobheni amancane angathintekanga namanye athintekile kodwa izixhwanguxhwangu zanqandwa zingakaqedi ngawo, kuvela ukuthi ubuholi bomasipala bubambe iqhaza eliphambili ekuqinisekiseni ukuthi izigilamkhuba kazilitholi ithuba lokuwahlasela.
KuMasipala wasoNdini ubuholi bakhona busukume bama ngezinyawo ngesikhathi kuqala izibhelu ngoMsombuluko.
Kwaze kwaphuma iNkosi Mangosuthu Buthelezi ebusuku iyobonga abebevikela leli dolobha - okumanje seliphenduke ikhaya labathengi abavela ezindaweni ezahlukene ezilakhele, kwazise amadolobha abo, okubalwa iMelmoth neKwaNongoma abhubhile.
Ikhuluma neLANGA iMeya yasoNdini, uMnu Wilson Ntshangase, ithe kwathi uma bezwa ngokuqubuka kwalezi zibhelu ekuseni bangoMsombuluko womhla ka-12 kwephezulu, bahlangana bewumkhandlu kamasipala.
“Namhlanje idolobha lasoLundi liyasebenza, kabekho nabantu abalahlekelwe yimisebenzi yabo noma impilo ngoba senze konke okusemandleni ethu ukulivikela.
"Sihlanganile siwumkhandlu nezisebenzi zikamasipala, osomatekisi bendawo, osomabhizinisi nezinhlaka zezokuphepha saphuma sagada ubusuku emini.
"Lokho sikwenze ngoba besibona ukuthi uma singavumela isimo esinjengalesi, abantu bakithi bazophelelwa yimisebenzi bangabi nendawo abazothola kuyona ukudla,” kusho imeya.
Ithi bebenanovalo lokuthi lesi simo sizobuyisela emuva intuthuko asebenayo njengedolobha. Ezindaweni eziningi ebezigadiwe, bekubonakala abantu abebephethe izinhlokohlela zezibhamu begade izindawo zabo - kodwa yona ithe bebephume bephethe izagila nje kuphela.
“NgoMsombuluko, bakhona abazamile ukuhlasela bethi bazontshontsha, kodwa sabanqanda. Nakhona bekuyizingane nje ebezifuna ukuganga ngoba zibona nakwezinye izindawo kugangwa.
"Sibonga ukuzinikela kwabebebambe iqhaza, besingalali sigade ubusuku nemini. Sibonga nakuMntwana waKwaPhindangene (iNkosi Mangosuthu Buthelezi), ophume ngokwakhe ngoLwesi-thathu (mhla ka-14) wazosiqinisa thina ebesivikela idolobha,” kusho iMeya uNtsha-ngase.
Maphakathi nesonto lo masipala uke wakhipha izimemezelo, uthi ukudla okukhona kuzodayiselwa abantu abakhele leli dolobha kuphela, nokho ugcine ukushintshile lokho, wadayisela bonke abantu.
IMeya yaseMtubatuba, uMnu Thobelani Ncamphalala, nayo umasipala wayo osindile, ithe izigilamkhuba zizame ziphindelela ukuhlasela kuleli dolobha, kepha benza konke okusemandleni ukulivikela.
Ithi kuke kwaba nzima ngesikhathi zizama ngisho ukushisa indawo okugaywa kuyona ushukela, kodwa bala ukhasha ngoba abantu abaningi baseMtubatuba basebenza kuyona le ndawo.
“Laba bantu baqale bashisa ihhotela Umfolozi Protea (ngaphansi kukaMasipala iMfolozi) elingekho ngaphansi kukamasipala wethu, base bewela ibhuloho elisihlukanisile, bahlasela indawo yokucima ukoma, elokishini laKwaMsane, bashisa emahhovisi kamasipala amancane akhona kuleli lokishi.
"Bazame ukungena edolobheni kwasho ukuthi sesibalindele. Bebezama ubusuku nemini ukuzogqekeza, bantshontshe ezitolo, kodwa salokhu sigadile.
"Bazame amahlandla amathathu ukushisa amahhovisi amakhulu kamasipala asedolobheni, kodwa sakwazi ukubavimba. Kube wukusebenzisana kwezinhlaka eziningi ukuthi sikwazi ukuvikela idolobha lethu,” kusho yena.
Uthi ukuba nobudlelwano obuhle nezinhlaka zezokuphepha, amakhansela, osomatekisi, osomabhizinisi namalungu omphakathi, kube nomthelela omuhle kakhulu.
Ekhuluma neLANGA ngoLwesibili ntambama, uthe baphuma emhlanganweni nalezi zinhlaka lapho bebeyobonisana khona ukuthi ezokuphepha zingaqhutshwa kanjani nokuthi njengoba idolobha sebelivulile lonke, kumele nazo ziqine kakhulu kunakuqala.
Uthi namalungu umphakathi abezifikela, eyozicelela ukulekelela lapho engalekelela khona.
“Sibe nokusebenizisana okuhle nabanikazi bezitolo - kusukela kwezokudla kuya emagalaji kaphethiloli - njengoba sigcine sesengamela indlela abasebenza ngayo.
"Sizivulile izitolo ezimbalwa kusukela ngoLwesine olwedlule, kodwa saqinisekisa ukuthi kungenwa kuphinde kuphunywe endaweni eyodwa. Ezokuphepha sisaziqinisile namanje,” kusho uMnu Ncamphalala.
Uthi njengamanje idolobha labo lithengisela nabantu abaphuma ezindaweni ezahlukene, okuhlanganisa iKwaHlabisa, uMkhuze, iJozini nezinye izindawo ezinamadolobha aphazamisekile.
Utshele ILANGA ukuthi abezitolo baqinisekisile ukuthi kunokudla okwanele njengoba bexhumane nababathumelela khona abaseGoli ukuthi babathumelele ngendlela ngoba izindawo ezigcina ukudla eThekwini zihlaseliwe, zashiswa.
NgoLwesine olwedlule ukwethiwa kukaphethiloli bekulawulwa eMtubatuba njengoba imoto ngayinye beyivumeleke ukufaka okaR300 kuphela.
UMnu Ncamphalala uthi lokhu bebekwenzela ukuthi bonke abantu bawuthole uphethi-loli.
"Bekuqala ukuthi kwenzeke lokhu futhi bekungalindelekile. Sibonga abantu baseMtubatuba ngokusivumela ukuba sibahole kulesi sikhathi ebesinzima.
"Kuyasijabulisa ukuthi kabekho abashonile noma abalahlekelwe yimisebenzi yabo (eMtubatuba). Kayikho futhi nengqalasizinda ecekelwe phansi," kusho yena.
UMnu Thami Ntuli oyimeya yaseNkandla, uthi izigilamkhuba zikwazile ukulimaza izitolo ezithile, kodwa bakwazi ukuvikela ingxenye yedolobha ngokubambisana nomphakathi.
"Kuvele kwatheleka abantu okungaziwa ukuthi ngabakuphi, bahlasela izitolo. Sihlanganile savikela abebengakazithinti. Yize uphethiloli uke wasiphelela, manje isimo sesibuyele esimeni.
"Amathangi kabawathintanga kanti zikhona nezitolo zokudla esiphumelele ukuzivikela, kuyimanje ezokuphepha siziqinisile edolobheni,” kusho yena.
Usomabhizinisi waseThekwini onegaraji likaphethiloli, uthi usizwe wukuqasha abezokuphepha ngesikhathi kusuka izibhelu eThekwini.
"Kwakuba ibhizinisi lami lisekhona, ngisizwe yilokho ngoba izindawo ezinezitolo bazilimazile bazitapela, kodwa ngenhlanhla kabashisanga,” kusho yena ecela igama lakhe ligodlwe ngoba ethi akakakhululeki ngendlela isimo esiyiso.
Kuleli garaji bekugade amadoda abephethe izibhamu ngezandla ngeledlule, kuyiwo akhombayo uma imoto kufanele ingene ithele uphethiloli.
Baningi abantu okulindeleke ukuba balahlekelwe yimisebenzi ngenxa yalezi zibhelu, nesibalo sabafile silokhu sikhule njalo.