Okungajwayelekile kowe-Afro-Soul
KWENZEKE okungajwayelekile kufihlwa iciko laseMlazi, uSergeant Satshwa Malishe obeyilungu leqembu lomculo, i-Afrosoul njengoba inkonzo yomngcwabo wakhe iqhubeke isidumbu sakhe sesifihliwe izolo ngoLwesithathu emathuneni ase-17, kulona leli lokishi.
UMalishe obenephimbo elimtoti, washona ngoLwesibili lwangomhla ka-13 kwephezulu emuva kokugula isikhashana. Ngemuva kokufihlwa kwesidumbu sakhe, umndeni nezihlobo bahambe bayothamela inkonzo yakhe ebisepaki iHow Long, khona eMlazi, ihlelwe ngabantu bamazinga ahlukene, okubalwa kubona namaciko aKwaZulu-Natal abephume ngobuningi.
Kugqame umculo ngesikhathi kuqhubeka inkonzo yaleli ciko obekubatshazwa ikhono lalo emculweni. Abaningi abakhulume kule nkonzo bababaze ukuzithoba nokuhlonipha kwakhe lo mculi nakuba ebenomzimba wesidlakela. USabelo Ngema asungule naye i-Afrosoul, uthembise abazili ukuthi ngeke baphele amandla ngokudlula kukaSatshwa emhlabeni. Uthe bazoqhubeka naleli qembu yize kuzoba nzima, kodwa akukho abangakwenza njengoba naye uSatshwa bekuyisifiso sakhe ukubabona bekwelinye izinga ngomculo.
Uthe ngesikhathi beliqala leli qembu ngo-2003, babenephupho lokuqala isikhungo sokuqeqesha amaciko, nebala ngo-2016 lafezeka ngesikhathi beqala i-Ikabawo Performing Arts Academy. Uveze ukuthi ngesikhathi benza isikhangiso sokuqala salesi sikhungo, babephesheya, bebhekene nezingqinamba zalo mkhakha. Utshele abazili ukuthi okubaduduzayo wukuthi uSatshwa udlule emhlabeni eseqalile ukubona izithelo zalesi sikhungo esikhombisa ukukhula futhi esesiqalile nokukhiqiza amaciko ahlukene.
USabelo osesele noThandeka Zulu kuleli qembu, uphinde wathembisa nabafundi base-Ikabawo ukuthi akukho okuzoshintsha njengoba basozoqhubeka njengoba ebenza uSatshwa obeqeqesha umculo kulesi sikhungo.
UThandeka naye uzwakalise ukukhala kwakhe ngokushona kukazakwabo. Uveze ukuthi uSatshwa nguyena obebalwela njengeqembu uma behlangabezana nezingqinamba kulo mkhakha.
Uthe bekuthi uma abantu sebebona kungena uSatshwa, kube yilapho bebona khona ukuthi isifikile i-Afrosoul ngenxa yesithunzi abenaso. Kulo mngcwabo abephume ngobuningi amaciko ukuyophelezela uzakwabo.
Amaciko abuye aduduzana ngobunzima abhekene nabo kusukela kwaqala ukuvalwa kwezwe ngenxa yokubhebhetheka kweCoronavirus ngonyaka odlule njengoba engakwazi ukunandisa.
Abaculi abafana noThina Zungu, uJumbo, uJoocy banyakazise inkundla ngomculo. I-Afrosoul esike yahlabana ngezindondo ezahlukene, iyaziwa ngamanoni okubalwa "Inkomo", "Ilanga", "Usemncane" namanye.
Khona manjalo iyafihlwa namhlanje ngoLwesine inkakha yomculi uTsepo "The Village Pope" Tshola eshone ngoLwesine ngenxa yeCovid-19.