ISILO SIBIZE UMHLANGANO WOKUHLANGANISA UMNDENI
EMUVA kwemibiko eminingi eshayisanayo ngezindaba zaseNdlunkulu kaZulu, uNdunankulu kaZulu, iNkosi Mangosuthu Buthelezi, ithi kubalulekile ukuthi kube nomhlangano womndeni ukuze kuthokalakale isixazululo.
Lokhu ukusho ngoLwesibili esigcawini sabezindaba ebesisesishayamthetho esidala saKwaZulu-Natal, oNdini. INkosi Buthelezi iveze ukuthi iSilo uMisuzulu kaZwelithini kaBhekuzulu sesibize umhlangano wokuhlanganisa izindlu zasebukhosini bakwaZulu. Ithe iSilo sithi lo mhlangano ubaluleke ngendlela eyisimanga futhi kumele wenziwe ngokukhulu ukuphuthuma kulandela ukukhuluma kwabaningi esidlangalaleni, bezibiza ngokuthi bangabasendlunkulu futhi bayayikhulumela, okudala ukuphambana kwemibiko nabakwabezindaba.
“ISilo sikholwa wukuthi lo mhlangano kumele uhlale ngokuphuthuma ukugwema ukudideka noqhekeko oselukhona emndenini,” kusho iNkosi Buthelezi.
Ithi ukukhathazeka kweSilo kuqutshulwa kakhulu yincwadi ebhalwe nguyisekazi, uMntwana Thembi Ndlovu, eyibhalela uNdunankulu waKwaZulu-Natal, uMnu Sihle Zikalala. Ithi kule ncwadi, uMntwana uThembi ubazisa undunankulu ukuthi njengendlunkulu sebekhethe ukuqoka uMntwana uSimakade kaZwelithini kaBhekuzulu ukuba kube nguye ozohlala kulesi sihlalo.
“Kule ncwadi uMntwana uThembi ucela leli hhovisi ukuba libhekelele futhi lihloniphe uMntwana uSimakade ngokufanayo nangokulinganayo njengeSilo esikhona njengamanje. Lokhu uthi ucela kwenzeke kuze kuphele umdonsizwano endlunkulu mayelana nokumele ahlale kwesobukhosi bukaZulu. Le ncwadi iqhubeka ithi abasendlunkulu banezingxoxo ezijulile
njengoba izindlu ezimbili, okungeyaKwaKhethomthandayo neyaKwaKhangelamankengane, sezizibophezele ekutheni zizowuhlanganisa umndeni,” kusho iNkosi Buthelezi.