Iyakhuthaza impumelelo kaMosimane ekuqeqesheni
ESIKHATHINI lapho kukuningi okulahlisa ngethemba okwenzeka eNingizimu Afrika, nokho iqinisa idolo impumelelo kaPitso “Jingles” Mosimane odlondlobala ngamandla kwezokuqeqesha njengoba esephinde waqopha omunye umlando ngokuba ngumlolongi wokuqala ompisholo wase-Afrika ukunqoba iCaf Champions League amahlandla amathathu.
Lo mlando uMosimane uwubhale ngoMgqibelo ehola i-Al Ahly yase-Egypt ihlula iKaizer Chiefs ngo-3-0 kowamanqamu walo mqhudelwano obuseMorocco. I-Al Ahly iyikilabhu yokuqala ukunqoba lesi sicoco izikhawu ezilishumi selokhu wasungulwa.
Yingakho kuyimanje iphethe umklomelo wokuba yikilabhu evelele kwikhulunyaka ngenxa yobungqongqo kulo mqhudelwano ongomkhulukazi kwedlalwa ngamakilabhu ase-Afrika.
Yingakho ukujoyina kukaMosimane le kilabhu nakho kwaba yingqophamlando ngoba yayingakaze icijwe ngumlolongi ompisholo emlandweni wayo. Le mpumelelo kaMosimane ikhombisa ngokusobala ukuthi kakukho okungenzeki empilweni, yinqobo nje uma ubeka umqondo wakho kukhona.
Kuzokhumbuleka ukuthi uMosimane wajoyina i-Al Ahly esuka kwiMamelodi Sundowns ayinqobela isicoco esifanayo ngo-2016. Wayishiya isamdinga njengoba yayisanda kumsayinisa inkontileka yeminyaka emine, okuyinkomba esobala yokuthi yayibethemba ubuholi bakhe ebhentshini.
Wahamba kwiSundowns eseyinqobele isicoco seligi amahlandla ayisihlanu. Lo mqeqeshi uhlale ekugcizelela ukuthi ukholelwa ezinselelweni ezintsha, hhayi ukuhlala ekhosombeni elifudumele.
Cishe uma abaholi bemikhakha eyahlukene bengasika iphethini kuMosimane, elakuleli lingakwazi ukunqoba izinselelo eziningi elibhekene nazo kusuka ebugebengwini obuhlalise lubhojozi isizwe, wubusela nenkohlakalo okukhahlameza umnotho wakuleli, wubuvila bezakhamizi eziningi ezehlulwa ngisho nawukuziphilisa ngemisebenzi yezandla, ukukha nje phezulu.