UPITSO MOSIMANE UBUYISE ISITHUNZI SABAMPISHOLO ENINGIZIMU AFRIKA
UMQEQESHI kanobhutshuzwayo waseNingizimu Afrika ohlonishwa kakhulu, uPitso “Jingles” Mosimane, ubabonise izinqe zenyoka labo abathi ibala elimnyama kalinalo ithalente elisezingeni eliphezulu uma liqhathaniswa nabaqeqeshi abamhlophe.
Le njulabuchopho eqeqesha iqembu laseGibhithe, i-Al Ahly, iqophe umlando ngokuthatha indebe yeCAF Champions League ihlandla lesithathu, ezayo ziguqisa iKaizer Chiefs ngo-3-0 eMorocco.
Emuva kokuthatha lena yalo nyaka, uMosimane unconywe ngongoti baphesheya.
Umdlali wasemuva weTottenham Hotspur yase-England, ogijima naseqenjini lesizwe laseSwitzerland, uRamón Vega, uncome uMosimane, wathi usekulungele ukuqeqesha e-Europe.
La eMzansi amaqembu amakhulu alanda abaqeqeshi phesheya ngoba nje bemhlophe. Uthole ukuthi umlungu wakhona wayeqeqesha amaqembu asezingeni eliphansi kwelakubo, bese thina simthatha simfake eqenjini elidlala kwiDStv Premiership.
Afike la ahluleke, simxoshe, besesilanda omunye.
Kasibethembi abantu bakithi, sithemba abelungu ngoba nakhu sikholwa wukuthi bahlakaniphe ukwedlula thina.
Sikhohlwe ukuthi nalabo abahlakaniphile, kabazange bazalwe behlakaniphile, nokuthi umuntu akahlakaniphiswa yibala, kodwa uhlakanishiswa wulwazi.
Ngesikhathi uMosimane eqashwa njengomqeqeshi weSupersport United ngo-2001, ongqesta bababhali bezebhola abamhlophe bakhuza bababaza, besho nokuthi akanasipiliyoni, kwasha kwacima.
Neningi lababhali abamnyama, nalo labhala lokho okwakubhalwa ngozakwabo abamhlophe. Wabavala umlomo uMosimane, wakhukhula izicoco eziningi phakathi kuka-2001 no-2007.
Yilapho iSafa yameshela khona ukuba ayoba ngumsizi womqeqeshi weqembu lesizwe, uCarlos Alberto Perreira.
Wagcina eseqashwa njengomqeqeshi kodwa yamehlula iBafana Bafana, okusho ukuthi inkonyane yayisathuka isisinga. Ngo-2012 waqashwa ngomakhelwane beSupersport iMamelodi Sundowns, lapho wafike wenza ezibukwayo ethatha iligi amahlandla awu-5, waze wawina nendebe yeCAF Champions League ngo-2016.
Sithe sisamshayela ihlombe, wajoyina i-Al Ahly ngo-2020, lapho waphinde wayithatha le ndebe yeCaf efika nje, wathatha neye-African Super Cup kowona lowo mnyama.
Wadlala nasendebeni yeFifa Club World Cup, lapho wakhishwa khona iqembu lodumo laseJalimane, iBayern Munich emdlalweni owendulela owamanqamu. UHans-Dieter Flick owayeqeqesha iBaryen ngaleso sikhathi, akawuvalanga umlomo ngekhono nobuhlakani bukaMosimane, esho nokuthi usekulungele ukuqeqesha e-Europe.
UMosimane uphinde wayithatha futhi indebe yeCAF Champions League kulo nyaka, wavala umlomo ababethi ufice i-Al Ahly ivele idlala umdlalo owendulela owamanqamu.
La eNingizimu Afrika bekuthi uma kukhulunywa ngabaqeqeshi abanohlonze, kubalwe abamhlophe kuphela okubalwa kubona uGordon Igesund, Gavin Hunt noClive Barker, njengezihlabani ezikhaliphile ebholeni.
UMosimane ubengabalwa yize esenze lukhulu ebholeni lakuleli. Ngo-2017 uMosimane wayebekwe ezingeni leshumi kubaqeqeshi abanohlonze emhlabeni wonke jikelele, okuyilapho wathola khona indondo njengomqeqeshi wonyaka e-Afrika, enikwa yinhlangano yebhola iCAF.
Usebalwa ohlwini longoti babaqeqeshi abawu-7 kuphela abanqobe indebe yeCAF Champions League kaningi. Iningi lalabo abadabuka e-Afrika bayiwine kabili kuphela, okusho ukuthi ubashaya emakhanda bonke.
Uzimele yedwa njengomqeqeshi ophumelele ukushanela zonke izindebe zasekhaya kulokhu kwasungulwa iligi yePSL.
Kumanje usebalwa nezinkakha ezifana noRabah Saadane wase-Algeria owaziwa njengo-’Sheikh ‘, owaqokwa yiAfrica International Sport Convention (CISA) njengesikhokho sasenyakatho ne-Afrika.
Kuzo lezi zinkakha, kubalwa noHassan Shehata waseGibhithe, ozohlala ekhunjulwa njengomqeqeshi wokuqala ukuhola iqembu lesizwe emidlalweni emithathu elandelanayo yeAfcon.
Wahola izwe lakhe lawina i-Afrika Cup Of Nations amahlandla amathathu - ngo-2006, 2008 nango-2010 - okuyinto engakaze ibonwe.
Olunye uqweqwe lomqeqeshi ophambili nguLamine N’Diaye waseSenegal, owayeqeqesha iqembu laseCameroon, iCoton Sport phakathi kuka-2003 no-2006.
Ekugcineni waqhubeka nokuphatha nezinye izingqungqulu zase-Afrika ezifana neTP Mazembe yaseDemocratic Republic of Congo (DRC).
Ukugqama kwakhe kuvele lapho encintisana esigabeni esiphakeme kunazo zonke kwindebe yomhlaba yeFIFA Club Wolrd Cup ka-2010, lapho iqembu lakhe ladlulela khona kowamanqamu futhi lahlulwa kancane yizingqungqulu zaseEurope, i-Inter Milan.
UMosimane usibuyisile isithunzi sethu, futhi wasiqinisa idolo njengabantu abampisholo kanti thina sonke sithi elethu.