Indaba kamazitapele ibuyisela elakuleli emuva kwezomnotho
AMADOLOBHA amancane asezindaweni zasemakhaya KwaZulu-Natal, ashayeke kakhulu ngesikhathi abantu bezitapela impahla ezitolo, bacekela phansi ingqalasizinda yezomnotho, ephathelene nezohwebo.
Lokhu kuvezwe yinhlangano yabalimi KwaZulu-Natal, iKwaZulu-Natal Agricultural Union (Kwanalu). Umonakalo odalwe yilolu dlame olukhungathe neGauteng, kulindeleke ukuba ubuyisele emuva ukuvuseleleka komnotho waseNingizimu Afrika.
Bese kunamahlume abesenika ithemba lokuvuseleleka komnotho emuva kokwehla kwawo nyakenye ngenxa yokubheduka kweCoronavirus, edala iCovid-19.
Umbiko osanda kukhishwa yizisebenzi ze-International Monetary Fund (IMF), okuyinhlangano yomhlaba ebolekisa ngemali kohulumeni bamazwe angamalungu ayo, uveza ukuthi iminotho yamazwe okuqubuka kuwona izibhelu, ishayeka kakhulu.
Amalungu eKwanalu ngabanikazi bemihlaba, abalimi nosomabhizinisi abanezimboni ezisebenzisa imikhiqizo yezolimo ukwenza izimpahla ezithengiswayo.
Eminingi imibiko yezindaba ibibheke kakhulu umonakalo emadolobheni amakhulu njengeTheku neGoli.
Lokhu kukhahlamezeka kwamadolobha amancane, ikakhulukazi awasezindaweni zasemakhaya, kuzokwandisa ubunzima kuwona.
Sekuneminyaka osomabhizinisi bekhala ngokuhluleka komasipala kula madolobha ukugcina ingqalasizinda isesimeni esifanele, bekhala nangokuthi bayehluleka wukumelana nokuhlinzeka imiphakathi ngamanzi ahlanzekile nogesi.
Lesi yisifo esikhungethe omasipala emadolobheni amancane kuzwelonke. Sikhuluma nje, inkampani yakwaClover isanda kunquma ukufukula imboni yayo ekhiqiza ushizi eseLichtenburg, eNorth West, iyiyise eQueensburgh, eThekwini.
AbakwaClover bathathe lesi sinqumo ngoba umasipala owengamele iLichtenburg wehlulekile ukunika imboni yabo ugesi namanzi ngaso sonke isikhathi.
Ukushayeka kwezomnotho kula madolobha asezindaweni zasemakhaya ngeke kugcine ngokulahleka kwamathuba emisebenzi, kodwa kuzonciphisa imali eqoqwa ngomasipala, kubashiye besesimeni abangeke bakwazi ukumelana nezinsiza zomphakathi.
Umbiko weKwanalu uthi ukuhlola kwayo kukhomba ukuthi lolu dlame lubhidlize ukusebenza komnotho emadolobheni asezindaweni zasemakhaya angaphezulu kwesigamu KwaZulu-Natal.
Emabhizinisini awu-15% emadolobheni, kube nomonakalo ophakathi kuka-40% no-80%. Kwamanye futhi awu-15%, umonakalo ubalelwa ku-11% kuya ku-40%.
Ngaphezu kwalokho, amadolobha awu-64%, kawasenakho ukudla okuthengiswayo. Kwawu-32%, kuyashoda ukudla, kodwa hhayi kangako. Awu-4% kuphela amadolobha okubikwa ukuthi anokudla okwanele.
Umphathi weKwanalu uNkz Sany la Marque, uthe ukuvalwa komgwaqo oxhumanisa iGoli neTheku, uN3 - osetshenziswa kakhulu ukuthwala imikhiqizo yezolimo engena nephuma KwaZulu-Natal - kube “yisigemegeme esibe nomphumela ongemuhle kubalimi, osozimboni bezolimo, izitolo nawo wonke amabhizinisi axhumene nezolimo”.
Ulinganise ngomkhiqizo wobisi athe iKwaZulu-Natal ikhiqiza u-25% yalo lonke olukhiqizwa eNingizimu Afrika.
“Umthelela wokuvalwa kwezikhungo lapho kubekwa khona iziqukathi zempahla, ukudla kwemfuyo, umanyolo nokushoda kwamafutha ezimoto, kuwushayile umnotho wezolimo kulesi sifundazwe,” kusho uNkz La Marque.
Akuzona ezolimo kuphela ezishayekile KwaZulu-Natal, naseGauteng njengoba nezohwebo, izimboni nezokuthuthwa kwempahla ziphazamisekile.
Okunye, osomabhizinsi abancane - ikakhulukazi aboMdabu, bahlukumezeke kakhulu. Lokhu kwandiswe ukuthi iningi labo kalinawo umshwalense ozokhokhela izindleko zokuvuselelwa kwamabhizinisi.
Phezu kwemishwalense ezinawo, izinkampani ezinkulu, ziyakwazi ukusebenzisa imali yazo ukuvuselela amabhizinisi ngesikhathi zisalinde inkokhelo yomshwalense.
Osomabhizinisi abancane bazolinda usizo lukahulumeni, imininingwane yalo engakadalulwa njengoba izikhulu zikahulumeni zisahlanganisa amakhanda ngenhlobo yosizo uhulumeni ongakwazi ukulunika osomabhizinisi.
Ukucutshungulwa komthelela wezibhelu emnothweni wamazwe olwenziwe yizisebenzi ze-IMF, luveza ukuthi ziba nomthelela ongemuhle. Imithelela ingaqhamuka ngokuncipha komkhiqizo wamafemu nezingxenye zomnotho ezingakhiqizi izimpahla - ezifana nezokungcebeleka, amabhange, nezinkampani zemishwalense.
Izibhelu zehlisa namandla ezakhamizi okuthenga impahla nezinye izidingo. Zehlisa amathemba ngekusasa zandise ungabazane, ikakhulukazi kubatshalimali nosomabhizinisi.
Umthelela uyehluka, kuya ngesisusa sezibhelu. Izikhulu ze-IMF zibika ukuthi izibhelu ezisuswa yisizathu sepolitiki kazibi nomthelela omubi kakhulu.
Lezo umsuka wazo okuyizizathu eziphathelene nenhlalo yabantu nesimo sezomnotho, ziba nomthelela onciphisa ukukhula komnotho.
Uba mkhulu futhi umthelela uma umsuka wezibhelu uhlanganise ezepolitiki, ezenhlalo yabantu nezomnotho.
Ongoti bezomnotho kuleli sebeqalile ukuxwayisa ngomthelela wezibhelu zesonto eledlule ekukhuleni komnotho wakuleli nonyaka.
Amabhizinisi amaningi aseyikhiphile imidanti ngomonakalo odalwe yizibhelu. Nokho umthelela wazo ekukhuleni komnotho uyoze ucace kahle uma iStats SA isikhipha imininingwane ngokukhula komnotho wakuleli wezinyanga ezintathu (ukusuka kuNtulikazi (July) kuya kuMandulo (September).