UMALULEKA UBUYELWA WUGQOZI NGE-DOWNS
KUBUYE ugqozi kumdlali obesezibona engasenayo indawo kwiMamelodi Sundowns eqala amalungiselelo esizini ezokwethwasa nale kilabhu eyizingqwele zeDStv Premiership.
UGeorge “Mido” Maluleka (osesithombeni) odlala esiswini kwiDowns, uveze ukuthi kuyamjabulisa ukuba sethimbeni labadlali bale kilabhu elilungiselela isizini ezayo. Isizini edlule iphele engasajwayele ukunikwa isikimu okwenze abaningi bambona enukelwa yizembe.
UMaluleka usekhempini yale kilabhu ebanjelwe e-University of Pretoria.
“Kuyinto enhle kakhulu ukuba yingxenye yeSundowns. Ukuqala amalungiselelo amasha kuqinisa ubumbano ekhempini ngaphambi kokuqala koshikishi.
"Yisikhathi engisithanda kakhulu lesi ngoba kujinywa ngokuzikhandla, kwenza nomzimba usheshe ubejwayele ubunzima. Njengoba nginikwe ithuba lokuqhubeka ngizozikhandla ejimini ngoba nginamaphupho amaningi engikholwa wukuthi kusamele ngiwafeze kule kilabhu,” kusho uMaluleka.
UMaluleka ujoyine iDowns esuka kwiKaizer Chiefs lapho abekade elithola khona ijezi.
NoRushine De Reuck obesekhempini yeBafana Bafana enqobe iCosafa Cup, uzwakalise ukujabula ngokubuyela ejimini yeDowns. Nokho ukhale ngokuthi akazange akuthole ukuphumula emuva kokunqoba isicoco seligi njengoba aphoqeleke ukungena ekhempini yeBafana.
Uthi kusekuningi asafisa ukukuzuza kwiBafana abenikwe nebhande lokuba yiphini likakaputeni. Uthi kumqoka kakhulu ukuqhubeka nokwenza kahle kwiDowns ngoba kuzonyusa amathuba okuhlale ebizwa ngaso sonke isikhathi ngumqeqeshi weBafana, uHugo Broos.
IDowns kuthiwa ingase idedele uKeegan Allan ukuba ajoyine AmaTuks agijima kwiGladAfrica Championship kanti uJody February angase abolekiswe ngenxa yokuthi kugcwele konozinti bale kilabhu okukhona kubona uRicardo Goss, uKennedy Mweene, uDenis Onyango noReyaad Pieterse.