Umba eqolo uBen 10 oyamaniswa neChiefs
Ikilabhu yakhe yaseFrance imdayisa ngo-R54 million
KUBEKWE u-R54 million ekhanda likaBongani “Ben 10” Zungu oyamaniswa neKaizer Chiefs avele ezinkundleni zokuxhumana ekhombisa uphawu lwayo.
I-Amiens SC yaseFrance - lo mdlali osasalelwe yinkontileka kuyona - ithi lo mdlali imdinga ekhempini yayo njengoba esenenkontileka kuyona.
Lokhu kushiwo yisekela likamengameli we-Amiens SC, uLuigi Mulazzi, elidedele izimbokodo zamazwi kuZungu.
UZungu (28) ukuleli emuva kokuqeda isizini edlule ka-2020/21 egijima kwiRangers yaseScotland abebolekiswe kuyona yile kilabhu yaseFrance. Uyisize yanqoba isicoco seligi.
Lo mdlali ozakhele udumo egijima kwiMamelodi Sundowns kuleli, kufanele engabe usebuyele eFrance njengoba ezakhe seziqalile ukulungiselela ukuqala kwesizini ezayo kodwa uhambo lwakhe lunamaginxiginxi osekwenze abaningi bakholwa wukuthi uzoyishiya le kilabhu.
Nokho uMulazzi, ugcizelele ukuthi basamlindele lo mdlali ukujoyina i-Amiens ngaphambi kokuqala kwesizini entsha yeLigue 2.
“Useyingxenye yethimba eliqashwe yi-Amiens SC. Kufanele abonakale lapho eqashwe khona,” kucashunwa uMulazzi.
Izinkinga zikaZungu kwi-Amiens zaqala ngesikhathi le kilabhu igencwa yizembe ngo-2019 ukuyodlala kwiLigue 2. Wake wamataniswa neMallorca yaseSpain ngaphambi kokujoyina iRangers ngasekuqaleni kwesizini edlule.
Nokho iRangers yanquma ukungamthengi lo mdlali ngo-R54 million ukuze abe ngowayo ngokugcwele ngesikhathi kuphela isivumelwano sokubolekiswa okushiye ikusasa lakhe lilenga emoyeni.
Abanye abadlali abayamaniswa neChiefs nguThabo Nodada weCape Town City kanti uKeagan Dolly kuthiwa usazama inhlanhla phesheya. Nokho kuthiwa nxa kungamlungeli khona uzimisele ngokujoyina iziMpofana. Usanda kuphelelwa yinkontileka kwiMontpellier yaseFrance.
IChiefs isanda kwethula u-Austin Thabani Dube osayine inkontileka yeminyaka emithathu esuka kwiRichards Bay FC.