IBAY FC NEMIZAMO EMISHA YOKUNGENA KWI-DSTV PREMIERSHIP KULE SIZINI
ILUNGISA amaphutha ngokuqinisa isikwati ngabadlali abanesipiliyoni iRichards Bay FC ngenhloso yokuzama ukudla ubhedu kwiGladAfrica Championship ngesizini ezoqala ka-2021/2022.
IBay FC yenze kahle ngesizini edlule njengoba ibiyingxenye yamakilabhu asembangweni wokunyukela kwiDStv Premiership.
Nokho-ke izinto zibuye zayibhedela okuholele ekutheni igcine ishoveleke emidlalweni yokuhlunga.
Le midlalo inqotshwe yiChippa United ebivele idlala kwiPremiership.
IRoyal AM kayiyidlalanga eyokuhlunga izeseka ngokuthi kusongwe iligi iqhwakele. Kumanje isahamba icala njengoba ilwela ukuba kugudluzwe iSekhukhune United esicongweni kubuyiselwe yona. Lolu daba lusezithebeni zenkantolo, kanti nayo i-AM ithweswe amacala yiPremier Soccer League (PSL).
USifiso “Jomo” Biyela (osesithombeni) onguSihlalo weBay FC, uthe bahlale phansi bazinuka amakhwapha ngokwenze baphunyukwa yiligi.
“Esikuhlonzile wukuthi besisebenzisa abadlali abaningi abasebancane ngeminyaka yobudala.
Bahlulekile ukumelana nengcindezi yokulwela ukunyuka. Leli phutha sililungisa ngokuthi siqinise isikwati sethu ngabadlali asebemnkantshubomvu.
“Abadlali bethu abasha nezinhlelo zesizini ezayo, kuzodalulwa ngoMsombuluko. Ukuba nabaqeqeshi abanesipiliyoni nokuba nabadlali abamnkantshubomvu ngikholwa wukuthi yikhona okuzokwenza kufezeke iphupho lethu lokunyukela esigabeni esiphezulu.
“Isizini ezokwethwasa ngiyibona izokuba nzima kakhulu njengoba kwehle iBlack Leopards ekusebenzisayo ukuthi idlalela ekhaya nxa iseVenda. Sihlaziya izinto eziningi okuyizona eziwumkhombandlela wezinhlelo zethu zangesizini ezayo,” kusho uBiyela.
Lesi sikhulu sithi bonke abadlali babuye beyimiqemane njengoba engekho okutholakale ukuthi uhaqwe yiCovid-19.
IBay FC iqale ngeledlule ukulungiselela ukuqala kwesizini entsha. UKhanyisa Mayo obengumgadli oqavile wayo, usejoyine iCape Town City egijima kwiPremiership. UThabani Dube yena ujoyine iKaizer Chiefs ngemuva kokwenza kahle kwiCosafa Cup enqotshwe yiBafana Bafana ngeledlule.