I-KZNA ilifune kwaMandela ilungelo lomjaho kaTata
Bazimisele ukuhlela umjaho wanonyaka kumnyama kubomvu
UMNDENI wakwaMandela uhlongoza ukusungula iMandela Marathon Association (MMA) ezosingatha wonke amalungelo okusetshenziswa kwegama likaNelson Mandela ezintweni ezithinta imijaho.
Lo mndeni kuthiwa wenza lokhu ngenxa yokwanda kwemidlalo okusetshenziswa kuyona igama lalo mholi owaba ngumengameli wokuqala wentando yeningi kuleli.
ILANGA lithole ukuthi iKwaZulu-Natal Athletics (KZNA) ihambisana namakilabhu asungula iMandela Day Marathon - egijinywa phakathi kweMbali neHowick abeseMvezo ngempelasonto.
Kuthiwa abeyohlangana nenkosi uMandla Mandela ongumzukulu kaMandela.
Kulo mhlangano kuthiwa uMandla ukhale kakhulu ngabantu abenza izinto eziningi ngaphansi kwegama likamkhulu wakhe kodwa bona bengazi. Kulo mhlangano kuthiwa uMandla uphakamise ukuba kusungulwe iMMA lapho bonke abafuna ukuhlela umdlalo ngaphansi kwegama likaMandela, bezofaka khona izicelo.
Kuthiwa uthe uMandela ziningi izindawo ahamba kuzona ngisho phesheya kwezilwandle. Uthi uma usuka eMvezo lapho okwazalelwa khona uMandela ulibangisa eQunu lapho afihlwa khona, kuwu42km. Uthi nakule ndawo kufanele engabe kunomjaho.
“Kulo mhlangano ziningi izinto eziphakanyiswe nguMandla. Uthi uma kukhona umdlalo owenziwayo ngaphansi kwegama likaMandela, kubalulekile ukuba amakilabhu nomphakathi bahlomule.
Uthi baningi abantu abaphuma KwaZulu-Natal asebeke bafike kuyena befuna iMandela Marathon.
Uthi wabaxosha ngoba babengahambi namakilabhu,” kusho uMandla Mngomezulu oyisekela likamengameli weKZNA.
I-KZNA kuthe ngeSonto yakhipha umbiko othi iyaqhubeka nokuhlela i-marathon yanonyaka. Lo mjaho kuthiwa uzokuba ngomhla ka-29 kuNcwaba (August). I-KZNA ithi iyakuqonda ukuthi izwe likulevel 4.
“Uma kwenzeka isimo singavumi ngomhla ka-29, lo mjaho sizowuhlehlisela ukuphela konyaka,” kusho uMngomezulu.
I-KZNA ibuyisa lo mjaho nje, uMgungundlovu District Municipality usanda kuyesabisa (iKZNA) ngokuthi uzoyifaka enkantolo uma iqhubeka nokuhlela lo mjaho. I-KZNA ithe uMgungundlovu ungabaxhasi bomjaho, kawukwazi ukuya enkantolo ngodaba oluthinta iMandela Day Marathon. Ithi abanikazi balo mjaho ngamakilabhu.
Imizamo yokuthola uMgungundlovu iphunzile njengoba kuze kwashaya isikhathi sokuloba uRay Ngcobo oyimenenja engazibambi izingcingo ezimbili abezanywa kuzona.
UJOSHUA UZOVIKELA AMABHANDE AMATHATHU KU-USYK