UDALULA OKWENZE WASHIYA ISIKHUNDLA KWI-KZNA
UVEZA okumenze washiya isikhundla sokuba ngusihlalo wabagijimi kwiKwaZulu-Natal Athletics (KZNA) uMartin Ngwenya, ophinde aqhoqhobale isikhundla sokuba yimenenja yeMaxed Elite.
UNgwenya waqokelwa esikhundleni sokukhulumela abagijimi okhethweni lwanonyaka lweKZNA olunqotshwe ezinyangeni ezimbalwa ezedlule nguSteve Mkasi osengumengameli.
Ukushiya kukaNgwenya kwenze kwaqubuka imibono eyahlukene ezinkundleni zokuxhumana.
Abantu abaningi bathe lokhu kuyinkomba esobala yokuthi kalukho uzinzo kwiKZNA ngaphansi kobuholi obusha.
UNgwenya ekhuluma neLANGA, uthe kakukho nkinga eholele ekutheni ashiye kwiKZNA.
Uthi uhlanganile noMkasi wamtshela ukuthi ucela ukuhoxa esikhundleni sakhe ngenxa yobuningi bemisebenzi abhekene nayo.
“Miningi imisebenzi engibhekene nayo. Ngisekilabhini yokugijima iMaxed Elite, ngibhekene noxhaso esilunika iSharks ekubeni neqembu eliya kumaOlympic Games lisekwe yithina.
"Ukuba matasa kule misebenzi kwenza ngingakwazi ukuba yingxenye yeKZNA. Ukungabi yingxenye yemihlangano (yeKZNA) bekuzosuke kwenze abanye bathi kangibahloniphi abagijimi.
“Ngiyibonile imibiko esabalele ezinkundleni zokuxhumana. Ngishiye kwiKZNA ngoba ngimpintshwe yimisebenzi. Kakukho ukungaboni ngaso linye kwibhodi.
Baningi abantu besula emisebenzini yabo, kangazi uma sekuyimina lenziwelani ihaba,” kusho uNgwenya.
UMandla Mngomezulu oyisekela likamengameli kwiKZNA, ukuqinisekisile ukushiya kukaNgwenya kwibhodi yeKZNA.
Uthi ubatshelile ukuthi umatasa, okuzokwenza angakwazi ukuba yingxenye yemihlangano yeKZNA.