ZIBALISA NGENDLALA IZIHLOBO ZABAFA EMLILWENI KWA-RHINO
Izihlobo zithi azazi nokuthi zizothathani zihlanganise nani ukubangcwaba
KUGQAME indlala nokweswela emindenini yabantu abangaphezu kwabawu-30 okuthiwa babhubha esitolo iJwayelani - esidume ngokuthi yikwaRhino njengoba kwakunalesi sitolo phambilini - kwaW, eMlazi ngeSonto ebusuku, abasha bangqonga emuva kokuqhuma kwe-gas.
Leli phephandaba lihambele amalungu emindeni yabashona kulesi sigameko, amanye alitshele ukuthi kuqala lezi zigigaba nje, vele indlala iyazenzela kuwona, kuyimanje baswele nokuthi bazothathani bahlanganise nani ukuze bafihle izihlobo zabo ngenxa yokweswela.
UNkk Maris Gamede (86), okwashona abazukulu bakhe ababili abayizintandane, okunguManqoba Gamede (15) noNkululeko Gamede (27), utshele leli phephandaba ukuthi isimo sinzima, kabanayo ngisho into abazolala beyidlile.
Uthe kabanayo nemali yokufihla abashonile, basizwa ngamalungu omphakathi abazamela uxhaso kubantu ukuze bakwazi ukufihla.
“Abazukulu bami baphuma lapha endlini ngabo-6 ntambama bangitshela ukuthi ukudla kuthathwa mahhala eJwayelani, abantu bayazitapela.
"Ngabatshela ukuthi kangikufuni ukudla okuntshontshiwe la emzini wami. Baphuma bahamba ngahlala ekhishini ngoba ngiqinisa khona ukuthi kangifune kudla okuntshontshiwe okuzongena endlini yami. Kwaphela isikhathi esincane kwabuya uManqoba ephethe izimpahla zokugcoba wazibeka emnyango, wangahlala, watshela izingane zakubo ukuthi usabuyela emuva uyolanda ukudla.
"Wayehamba nje, sasivele singenakho ukudla.
"Kwakungakapheli ngisho ihora ephumile, wabuya esengena nezicabha ekhala eshaya ngesudi yesele, eshe umzimba wonke.
"Wasitshela ukuthi sebeqhunyelwe yi-gas bephakathi esitolo, betapa ukudla.
"Wafika waguqa phambi kwami, wacela uxolo, wathandaza ecela ukuba iNkosi imthethelele ngesono abesenza sokutshotsha ukudla esitolo.
"Waqeda lapho wacela ukuphuziswa amanzi ekhala ngokuthi uyasha, waphuthumiswa esibhedlela. Sathola ukuthi ushonele esibhedlela efika odokotela bengakamboni,” kusho uNkk Gamede.
Uthi umfowabo kaManqoba omdala, akabange esabuya, wathathwa endaweni yesigameko waphuthunyiswa esibhedlela eshe kanzima. Washonela khona.
Umndeni wakwaGamede ucele noma ngubani ongaba namandla ukuthi awuxhase ngokuthi kufihlwe amadodana awo.
UNkz Ntombizodwa Myeza uveze ukuthi kushone amalungu amabili omndeni wakhe okunguMnu Philani Madiba (32) noMnu Khulekani Madiba (22).
Uthi uKhulekani waphuma kubo emuva kwenkulumo kaMengameli Cyril Ramaphosa - lapho ayememezela ukuthi izwe liyaqhubeka nokuba sesigabeni sesine sokuvalwa kwalo - wahamba nabangani bakhe beyotapa ukudla esitolo.
“Sathola ukuthi uqhunyelwe yigas engaphakathi esitolo.
"UPhilani wezwa ukuthi umshana wakhe useqhunyelwe yi-gas waphuthuma khona eyozama ukumsiza kanti naye uzofike alimale, washa wangqongqa.
"Silahlekelwe ngokushona kwabo. Bebengabafana abalungile, abebenakekela ugogo ekhaya,” kusho yena.
ILANGA likhulume noNkz Nompumelelo Hadebe ongunina omncane kaMnu Sbonelo Hadebe (21), okwasabalala isithombemnyakazo (video) sakhe ezinkundleni zokuxhumana eseshile, echaza ukuthi ushiswe yi-gas eyotapa ukudla eJwayelani.
Kule video ubonakala ehleli phansi ekhala ecela usizo.
UNkz Hadebe utshele leli phephandaba ukuthi uSbonelo wenza lokhu nje, wayephoqwa yisimo sendlala abaphila ngaphansi kwaso.
“Kuyimanje kasinayo ngisho imali yokuthenga ikhandlela esizolikhanyisa.
"Ngihleli nje emakhandleleni, kangazi nokuthi sizongcwaba ngani.
"Isimo sinzima, silala singadlile. Sithole ukuthi usha nje wayeyotapa ukudla. Wafika la ekhaya ngalo iSonto ebusuku eseshile, ekhala, ecela ukusizwa. Samphuthumisa esibhedlela wafike washonela khona,” kusho uNkz Hadebe.
ILANGA likhulume nekhansela lendawo, uMnu Thamsanqa Mthethwa, elithe besebezwile ngalesi sigameko esibashiye bethukile ngendlela abantu abashona ngakhona.
“Sidlulisa amazwi endunduzo emalungwini emindeni eshonelwe yizihlobo zayo ngale ndlela,” kusho uMnu Mthethwa.
Okhulumela amaphoyisa KwaZulu-Natal, uCol Thembeka Mbhele, uthe akhona amacala avuliwe eMlazi ngesigameko esenzeka kuleli lokishi sokusha kwesitolo.