Kabanendaba nokuvalwa oKhozini aboNyazi
Bathi miningi imisakazo abangashumayela kuyona
SEBEVALIWE ukushumayela esikhondlakhondleni somsakazo Ukhozi FM, abalandeli bakaMnu Mduduzi “Nyazilwezulu” Shembe emuva kokuphuma kwesinqumo seNkantolo yoMthethosisekelo esichitha uNyazilwezulu njengenkosi yamaNazaretha endlu yaseBuhleni.
Kuzokhumbuleka ukuthi mhla ka-22 kuNhlangulana (June), iNkantolo yoMthethosisekelo yakhipha isinqumo esichitha uNyazi njengenkosi yendlu yaseBuhleni.
Umbango waqala ngo-2011 emuva kokushona kukayise woNyazi, iNkosi Vimbeni “Thingolwenkosazana” Shembe.
Emuva kwalokho kwasukuma iNkosi yamaQadi, uMqoqi Ngcobo, yatshela amalungu ebandla ukuthi uThingo lwayitshela ukuthi umholi wuNyazi.
Emuva kwakhe kwavela ummeli woThingo, uMnu Zwelabantu Buthelezi, owaveza ukuthi uThingo lwaluqoke iNkosi Vela “Misebeyelanga” Shembe ngencwadi ukuba kube yiyona ehlala kwesoku-hola indlu yaseBuhleni.
Nokho iMisebeyelanga yaze yashona lungakaphothulwa lolu daba, njengoba uNyazi lwalulokhu luludlisela kwezinye izinkantolo ngethemba lokuthi zizokhipha isinqumo esehlukile.
Lwaluqale eNkantolo eNkulu yaseThekwini, lwadlulela kweyaseMgungundlovu, lwaya eNkantolo eNkulu yokudluliswa kwamaCala eBloemfontein njengoba kwaze kwalamula iNkantolo yoMthethosisekelo. Zonke lezi zinkantolo zaluchitha uNyazi.
Ngenxa yokuqhubukushwa endlini yaseBuhleni, iMisebeyelanga yagcina isiphume inxiwa layo laseThembezinhle, isikhundla sokuhola sanikwa umfowabo, iNkosi Phinda “Kukhanyakwelanga” Shembe.
Uhlangothi loNyazi seluvaliwe ukushumayela ohlelweni lwangoMgqibelo oKhozini olubizwa ngeTende Lemicimbi, olushayelwa nguBheka Mchunu.
Kulolu hlelo bekudlala intshumayelo yaseBuhleni neyaseThembezinhle ngokushintshana. Emuva kwesinqumo seNkantolo yoMthethosisekelo, abameli baseThembezinhle, iNkosi Trevor Attorneys babhalela uKhozi FM incwadi, bethi yibo abaseBuhleni abasemthethweni njengokusho kweNkantolo yoMthethosise-kelo, ngakho kasikho isidingo sokuthi umsakazo udlale intshumayelo yabo, udlale neyaboNyazi ngoba lokho kuzodida abantu.
“Thina siyiNazareth Baptist Church eBuhleni ngokuvunywa yinkantolo. Kasikho nesincane isidingo sokudlala intshumayelo yebandla elilodwa kabili.
"Intshumayelo okuthiwa ngeyaseThembezinhle sicela niyibize ngokuthi yintshumayelo yeNazareth Baptist Church eBuhleni. Ngamanye amazwi, sithi mayibe yodwa intshumayelo edlalwayo emsakazweni okungeyaseBuhleni obuholwa yiNkosi Phinda Shembe,” kusho incwadi yabameli.
UMnu Nkululeko Mthethwa okhulumela indlu yaseBuhleni evunywe yiNkantolo yoMthethosisekelo, uthi bayibhalile impela incwadi, becela kuvalwe aboNyazi ukuba bashumayele ngegama laseBuhleni, okuyigama labo.
“Abameli bayibhala mhla ka-7 kuNtulikazi (July), sikujabulele ukuthi basilalele (aboKhozi) njengoba bedlale eyethu kuphela ngesonto eledlule,” kusho yena.
Okhulumela ezoNyazi, uMnu Lizwi Ncwane, uthe kuyilungelo layo iSABC ukudlala noma yiphi intshumayelo. “Akithina esaya kwaSABC sacela ukushumayela, kodwa yiyona eyeza kithina.
"Uma seyinquma ukusiyekisa, okwayo lokho. Esikushoyo nje thina wukuthi sihamba noNyazi futhi sinezindlela eziningi zokufinyelela kubantu bethu.
"UKhozi uma lusivala, lokho kuzovulela eminye imisakazo ithuba lokusidlala ngoba akulona lodwa, imisakazo, miningi. Kasikugqizi qakala lokhu olukwenzayo, kodwa sikubona njengokuvuleka kwethuba leminye imisakazo ukuba isidlale,” kusho uMnu Ncwane.
Okhulumela iSABC, uNkz Mmoni Seapolelo uthunyeliwe imibuzo nge-e-mail wathembisa ukuthi uzoyiphendula, kodwa kwaze kwashaya isikhathi sokuloba engaphendulile.
Esikushoyo wukuthi sihamba noNyazi futhi sinezindlela eziningi zokuba sifinyelele kubantu bethu.