UKHUTHAZA INTSHA UKUBA NGABALIMI
Uthi usekwazi ukuthola isivuno sika-R228 000 ngamaklabishi
UMNU Khulekani Khumalo onebhizinisi lezolimo athi limenzela enhle imali yize wagcina kwaSTD 3. UMnu Khumalo uthi ensimini yakhe utshale ummbila, iklabishi, upelepele nokunye okuningi.
UDINDA isililo ngokuphazanyiswa wumkhuba wokuntshontshwa nokudunwa kwezimoto ziweliswe umngcele ohlukanisa iNingizimu Afrika neMozambique, umlimi waseBhekabantu, KwaMhlabuyalingana, onamasimu ommbila, iklabishi, yispinach nopelepele emhlabeni owu-11 hectres.
UMnu Khulekani “Bhobozani” Khumalo (44), owagcina kwa-Std 3, ungumnikazi weBhobozani General Trading Pty Ltd, engunina weBhobozani Green Farming. Uthi kusukela ekukhuleni kwakhe kuze kube yimanje, akakaze awuthole umsebenzi lapho azoqashwa khona ngokuphelele.
Uthi usebenze isikhathi eside ezinkontilakini akha izindlu nezakhiwo ezinkulu eHluhluwe, okwathi ngo-2016, wafikelwa wumcabango wokuba athathe imadlana ayitholayo ngokwakha izindlu, waqala ngokutshala umbila.
Uthi akazisoli ngokungena kwezolimo njengoba manje esekwazi ukutshala iklabishi lika-R38 000 emuva kwalokho athole isivuno sika-R228 000.
“Ngisebenze kakhulu ezinkontilakini ngakha izindlu. Ngahlala phansi, ngabheka ukuthi yini engingayenza ukuze kushintshe impilo yami. Ngabona ukuthi umhlaba ukhona namanzi akhona emfuleni uPhongolo, ngaqala ngatshala. Zonke lezi zinto engizitshalayo ziyayenza imali. Ummbila uthengwa ngabantu abasuka kude, nabendawo. Idazini lenza u-R50.
"Kuyenzeka kufike imoto iphume igcwele inyinyitheka, ishiye u-R12 000 ngosuku olulodwa nje,” kusho uMnu Khumalo othi amaklabishi yiwona anemali.
Uthi upelepele uthengwa kakhulu ngabomdabu waseNdiya abasuka ezindaweni ezahlukene, ikakhulukazi eThekwini naseMgungundlovu.
“AbaseNdiya bawuthenga kahle kakhulu upelepele wethu. Nabantu bakithi bayawuthenga bayozithengisela kwezinye izindawo ngenani labo,” kusho uMnu Khumalo.
Uthi kuyamthokozisa ukubona indodana yakhe, uMnu Simphiwe Khumalo (21) izimisele ngokungena igxile kulo mkhakha njengoba kumanje isenyuvesi, yenza izifundo zezolimo.
“Lo mfana wayefuna ukufundela le misebenzi yabo yasemahhovisi, kodwa ngamhlalisa phansi, wagcina ewushintshile umqondo. Wagqugquzelwa wukubona impilo yalapha ekhaya ekubeni mina ngingafundanga kanti nonina akafundanga okuyaphi. Kumanje sezimngene ngaphakathi ezolimo.
"Nginabantu abangisebenzelayo futhi akwenzeki ngephule isivumelwano sami nabo sokuholelana,” kusho uMnu Khumalo. Uveze ukuthi kumanje uthathe abafundi abawu-8 baseBhambanana TVET, abenza izifundo eziphathelene nalo mkhakha.
“Ngikujabulele kakhulu ukubona lezi zingane zizocela ukucoshela ulwazi ezitshalweni zethu. Nazo ngizihlalise phansi, ngazitshela ukuthi akubalulekile ukuthi zifunde ngokwami, kodwa mazithi zifunda zitshale okwazo nazo.
"Ngizinike injini yokudonsa amanzi namapayipi amathathu, ngathi mazifake phansi imbewu. Kumanje zibhalisa inkampani yazo.
"Ngiyazibona ukuthi zizimisele. Nazo zizophumelela maduze nje empilweni ngoba izitshalo zethu zonke zivunwa njalo ngemuva kwezinyanga ezintathu.
"Nokho-ke ngazichazela siqala ukuhlangana ukuthi akudingeki amasudu nama'qhoksi' lapha, umuntu kumele akulindele ukuthi kuyangcolwa. Uyabona nje lapha, sithengelwa kakhulu ngabantu baseFree State naseMpumalanga,” kusho yena.
UMnu Khumalo uthe ziningi izinselelo abhekene nazo ezimbuyisela emuva - kungeyena yedwa, kodwa nabanye abalimi basendaweni - ubalule inkinga yokuntshontshwa kwezimoto zakuleli ziweliselwe eMozambique.
Uthi amakhasimende amaningi ayaye afone abuze isitokwe, kodwa abuye aphelele emoyeni ngenxa yokwesaba ukuthi kuzothathwa izimoto namaloli awo.
Utshele ILANGA ukuthi kuyaye kudingeke ukuba axhumane nabombutho wamasosha ukuba bagade izimoto eziyothenga. Uveze ukuthi kwesinye isigameko sangonyaka odlule, kwathathwa iloli elaliyothenga komunye umlimi.
Ubalise nangokubheduka kweCoronavirus ngonyaka odlule, wakhala kakhulu nangezethembiso zikahulumeni ezingafezwa maqondana nokuxhaswa kwabalimi.
“Sinenkinga yokungabi namanzi anele ukuchelela izitshalo zethu. Nakuba uhulumeni uhudula izinyawo ekusesekeni, kodwa ngeke ngiqambe amanga, siyaphila impela. Yonke into esinayo iphuma emhlabathini, ngisho impahla engiyigqokile lena iphuma phansi.
"Phela ukotini uyatshalwa njengotamatisi nje. Igolide okwenziwa ngalo izinto eziningi liphuma phansi, idayimane, uwoyela konke kuphuma phansi.
"Ukuba iyabona intsha, ngabe iyaphuthuma ingene kulo mkhakha ngoba ngikhuluma nje, kumanje abanye abantu basheba imisebenzi kahulumeni nezolimo.
"Abanye bathenga izinkomo zobisi bazithengise. Ukuba kuya ngami, besizongena sibe baningi kulo mkhakha. Mina kangifundanga, kodwa kanginamahloni okuncintisana nezifundiswa ezinemali ngoba nami nginemali njengazo futhi eyami iphuma ezandleni zami.
"Ukuba ngafunda ngangizothuthuka kakhulu kulo mkhakha ngoba ngangizosebenzisa ulwazi lwami lwesikole.
"Nokho-ke nalo lolu engaluthola kwa-Std 3, luyasebenza ngoba ngiyazi ukuthi uma ngifaka izithombo eziwu-5 000 zeklabishi - engizolithengisa ngo-R6
lilinye uma selilungele ukudliwa ngizohlomula malini emuva kwezinyanga ezintathu kuya kwezine,” kusho uMnu Khumalo.