Usomatekisi ubulawe ngemvula yezinhlamvu
Kuthiwa abemi nabo bathelwe ngamachaphazelo kanti basesibhedlela
ASATHUTHUMELA amalungu omphakathi waseVerulam, ngesihluku asibonile kudutshulwa usomatekisi ngentululwane yezinhlamvu ngoMgqibelo emini, okugcine ngokuthi aphelele endaweni yesigameko.
ILANGA lithole ukuthi uMnu Dumisani Khoza (46), waseResevoir Hills, eThekwini - obenamatekisi kusoseshini we-Ilembe - wehlelwe yilesi sigameko emi nabesilisa ababili, bona abaphuthunyiswe esibhedlela emuva kokulimala.
Kuthiwa kwenzeka konke lokhu nje, inkosikazi yakhe ibisemotweni abehamba ngayo. Yona kayidubulekanga.
Ngokuthola kwaleli phephandaba ngelungu lomphakathi elizibonele lesi sigameko, kuthe ngesikhathi uMnu Khoza esaxoxa nalaba besilisa abemi nabo, kwaqhamuka owesilisa obefake isifonyo nesigqoko - engabonakali ebusweni - ehamba ngezinyawo, waqonda kubona sengathi kukhona ayokubuza.
Uthe uma eseseduze, wakhipha isibhamu ngokushesha wadubula ebhekise ngakuMnu Khoza nalaba abeme nabo.
Kuthiwa udubule uMnu Khoza ephindelela ekhanda, abeme nabo badubuleke emlenzeni nasengalweni.
Kuthiwa umbulali uqede ukudubula wabaleka ngezinyawo, wacoshwa yiPolo ebomvu endleleni, engenazo izinombolo.
ILANGA lithole ukuthi uMnu Khoza ubulawa nje, ubesanda kufika endaweni yesigameko.
Kubukeka sengathi imoto ecoshe umbulali ibivele imlandela, ilinde ukuthi aze afike endaweni azokwehla kuyona emotweni.
“Ngisekude ukukhohlwa yinto engiyibonile, umuntu edutshulwa ebulawa phambi kwethu.
"Bekungathi kuqoshwa ifilimu. Lo mfanyana omfishane uqhamuke singanakile, futhi ubungeke uze ucabange ukuthi uphethe isibhamu, noma nje kukhona into embi azoyenza.
"Besizitshela ukuthi ngumfana wasendaweni kanti kasazi ukuthi uzobulala.
"Uma ngivala amehlo, ngimane ngibone isithunzi sakhe lo mfana ekhipha isibhamu,” kusho ilungu lomphakathi.
ILANGA likhulume nomphathi wehhovisi leSantaco KwaZuluNatal, uMnu Sfiso Shangase, othe bese bezwile ngalesi sigameko.
“Ngizoqala ngidlulise amazwi enduduzo emndenini wakwaKhoza nakubafowethu ababili abalimele abasesibhedlela.
"Siyacela ukuthi kozakwethu esinabo kule mboni, sifunde ukuhlala phansi uma kukhona lapho esinyathelane khona, siyilungise inkinga singaze sibulalane ngoba lona wumsebenzi wethu esondla ngawo imindeni yethu.
"Sinxusa ukuthi kube nokuthula kule mboni esiyaduma ngokubulalana,” kusho uMnu Shangase.
Okhulumela amaphoyisa KwaZulu-Natal, uCol Thembeka Mbhele, uthe lesi sigameko senzeke emini ngoMgqibelo, amaphoyisa asevule amacala amathathu; elilodwa lokubulala namabili okuzama ukubulala.
Uthi amaphoyisa aphansi phezulu nophenyo, bekungakaboshwa muntu.