UFIHLWE NANGABE-MK OWAYEYINTATHELI E-SABC
LUPHELEZELWE ngamasosha olwaluyibambe nawo kuMkhonto Wesizwe (MK) ugalagala lwentatheli, oluzakhele igama lusebenza kwa-SABC, uMnu Manzolwandle Hadebe (62).
UMnu Hadebe ushone isigubhukane emasontweni amabili adlule ngemuva kokuxinwa wukugula esemzini wakhe ePhangweni Mission, eMtshezi, lapho efihlelwe khona ngoMgqibelo, enkonzweni ebihanjelwe nangamasosha ayeyibambe nawo esekwiMK, abedlubhe izevatho zalo mbutho.
Wafulathela iNingizimu Afrika ngo-1978 eyojoyina iMK kanti utha-ndo lwezobuntatheli lwenza wa-funda izifundo zokucoshela izindaba eSchool of Journalism, eTanzania.
Ngesikhathi ebuya ekudingisweni ngo-1994, wajoyina iSABC ecoshela izindaba ezithinta abaholi abehlukene, wabuye wagxila na-sezindabeni zasezinkantolo.
Ushiye eSABC wasebenza kuMasipala waseMtshezi ngaphambi kokuba uhlanganiswe nowaseMbabazane njengoba sewaziwa ngeleNkosi Langalibalele.
Ushiye emhlabeni umkakhe, izingane, abafowabo nodadewabo.
Kuzo ezokushona kwezintatheli, umkhakha wezemidlalo ugqemeke engeqiwa ntwala kushona uCoudjoe Amankwa waseGhana osebenzele amaphephandaba amaningi akuleli. U-Amankwa wake wazakhela udumo ngehlaya elenzeka eshaya isikhala ngo-2001, ngesikhathi iKaizer Chiefs ino-mkhankaso eyabe iwuqambe ele-Operation Vat Alles, noma i-Operation Thatha Zonke (izinkomishi).
U-Amankwa wabhala kwiCitizen ukuthi iChiefs iqhamuke nesiqubulo esithi: Operation Fat Alice. Ubeyindoda ebinomoya omuhle, futhi ewuthanda umsebenzi wakhe njengoba ebebuye ahlaziye ezemidlalo kumabonakude. Ushone emuva kokuxinwa wukugula isikhashana. Silobe engakaphothulwa amalungiselelo okumfihla.
Sisekuzo ezefu elimnyama kwezemidlalo, u-Ian Palmer owazakhela udumo edlala kwi-Orlando Pirates, uthathwe wukufa okuhlobene neCovid-19.
Ngesikhathi esebeke amakhokho ethala, ucije amakilabhu ahlukene agijima kwiPSL okubalwa kuwona iMaritzburg United.
Silobe ingakakhishwa imininingwane yokufihlwa kwakhe.