INJABULO BETHUNGELA ABAMA-OLYMPICS INGQEPHU
BAYAPHUPHUMA yinjabulo abasiki bengqephu baseThekwini, abathole ithuba elingandele bani lokwenza indwangu namaphethini ezimpahla ezigqokwe yiqembu elimele iNingizimu Afrika kwiOlympic Games 2020, eqale ngesonto eledlule, ezoze iphele mhla ka-8 kuNcwaba (August) eTokyo, eJapan.
Yize kube nemibono eyahlukene ezinkundleni zokuxhumana ngesikhathi kuvela iqembu lakuleli, abanye bekhombisa ukukuthokozela ukwehluka kwalo kwamanye, abanye bathe kabaqondi ukuthi le mibala ilikhangisa kanjani leli zwe okuhlala kulona abantu abahlukahlukene.
Ekhuluma neLANGA uMbali Zulu (35), waseChesterville, eThekwini - ongomunye wabasiki bengqephu - uthe kube yithuba elibalulekile leli kuyena njengomsiki wengqephu.
Uthi baqokwa ngabeDurban Fashion Fair ukuba babambe iqhaza ekuqhamukeni nezimpahla ezizogqokwa yiqembu lakuleli kule midlalo.
Ngemuva kokuhlangana kwabo, uthi babona kubalulekile ukusebenzisa i-print ezomela iNingizimu Afrika, okuyikho okwenza bakhetha ukuthi ibe nezilwane ezahlukene.
Kukhona idube, ingwe nembali ethathwa njengeyesizwe, iProtea nefulegi lakuleli. “Sikhethe izilwane ngoba iNingizimu Afrika yaziwa ngeziqiwi ezahlukene nezilwane eziningi eziheha izivakashi zaphesheya kwezilwandle njeBig 5 (ibhubesi, indlovu, inyathi, ubhejane nengwe).
"Leli thuba lifike kithina ngoNhlolanja (February), sanikwa amasonto amathathu ukuba sihlanganise iphethini,” kusho yena.
Uthi amayembe abadlali besilisa bawathathele esitayeleni samayembe kaMnu Nelson Mandela owaba ngumengameli wokuqala wenta-ndo yeningi eNingizimu Afrika. Bane abasiki abakhe-thwa.
NguMbali, uSipho Lushaba (27), uSandile Sikhakhane noNompumelelo Mjabu. USipho waseNanda - ongumnikazi weSVL Designs uthe: “Kungijabulisile ukuqokwa njengomunye wabasikingqephu kuleli thuba elingandele bani. Nokuhlangana kube yinto elula ngoba sihlukaniselane umsebenzi,” kusho yena.
Uthi abadlali bathi kabafuni ukugqoka ama-tracksuit ngoba eTokyo yisehlobo njengamanje. “Ezinyangeni ezimbili ezedlule kube sekwethulwa ngokusemthethweni umsebenzi wethu.
"Ukubona indlela abadlali abayijabulela ngayo impahla esibenzele yona, kwangijabulisa kakhulu. Yibona futhi abathi bacela kube yizikhindi namajumpsuit,” kusho yena.
Uthi yize ezwile ukuthi kukhona abangaqondi ukuthi le print isho ukuthini, uyakuqonda lokho, kodwa okubalulekile wukuthi abantu bazihluphe ngomsuka wayo ukuthi bayithathephi.
"Akithina sonke esizothanda into ethile, nalokho ngiyakuqonda. Okusijabulisayo thina wukuthi abadlali bayayithanda futhi bathi bayaziqhenya ngokuyovela phambi kwamanye amazwe begqoke ingqephu yethu. Yilokho ebesikufisa,” kusho uSipho.
UNkz Zulu uthi unethemba lokuthi ingqephu yabo izoba nomthelela nakwezokuvakasha ngoba uma abanye abahambele le midlalo eseTokyo befunda ngaleli lizwe, bazofisa ukulivakashela.
Bawu-185 abadlali abamele iNingizimu Afrika kule midlalo, kanti bazobamba iqhaza emidlalweni ewu-17 kwewu33.
Leli lizobamba iqhaza nasemidlalweni esanda kufakwa kumaOlympics, okuyi-skateboarding nesport climbing.