Ukwebiwa kwempahla uthi ngeke kumthene amandla
Uthi abatapayo bathathe konke ngisho isisefo semali nemishini yokukhokha ngekhadi
UFUNGA uyagomela usomabhizinisi wesifazane waseShowe owendlulwa ngabantu ababezitapela ezitolo, ezinye bezishisa - njengoba kwakunodungunyane olwasuka emuva kokuzinikela kukaMnu Jacob Zuma ejele ukuyodonsa isigwebo sezinyanga eziwu-15 ngokudelela inkantolo uthi ngeke aphele amandla, uzosivusa isitolo sakhe sokudla kwezilwane esaqala ukusebenza ngoNdasa (March) nonyaka.
UNkz Ayanda Nzuza (26), uthi abantu babethi ucabanga ukuthi wenzani njengoba evula i-Amashazi Animal
Feed Suppliers ngoba abantu abavame ukungena kuleli bhizinisi ngabamhlophe, uthi abantu bahhundule sonke isitokwe sakhe. Ngenhlanhla kabasishisanga lesi sitolo esidayisa ukudla kwezilwane - okubalwa izinkukhu, izinja, amahhashi, izimvu, izinkomo nezingulube - yimijovo yazo nezimfonyo, yizinto zokuthena namacici afakwa ezinkomeni. UNkz Nzuza uthi ngesikhathi abantu betapa, basishiya isitolo singenalutho. Bathatha ngisho isisefo semali, wumshini osetshenziswa uma abantu bekhokha ngekhadi nekhompyutha.
Uthi lesi sitolo saqala ukusebenza ngoNdasa emuva kwesikhathi eqongelela imali yokusiqala. Wehlelwa yilo mshophi nje, akakasitholeli nomswalense. "Bese ngiqashe abantu ababili abasebenza ngokugcwele kanti sekuzokwenzeka lo mshophi.
"Sengizamile ukuthenga amakhompyutha nesisefo, kuzothi uma kuqala isonto, ngiqale ngifake isitoko esisha. Angihlehli, kwazise ngesikhathi ngingena ebhizinisini ngangazi ukuthi ngizohlangabezana nezinselelo,” kusho yena.
Uthi uthando lokudayisa ukudla kwemfuyo lwaqala ngesikhathi kuvalwa izwe ngoNdasa wango2020, izisebenzi eziningi zavaleleka emakhaya.
"Ngangisebenza ukwamukela abafikayo esitolo (receptionist). Ngagcina ngisele nomqashi wami (kwazise ozakwabo babesebenzela emakhaya), okwangiphoqa ukuba ngiyifunde yonke imisebenzi ukumlekelela. Kwase kuyimina engenza ama-oda ezinto ezishodayo, ngibhekekele nebhizinisi.
"Ngafunda izinto eziningi, uthando lwaleli bhizinisi lwaqala lapho. Umqashi wami ubewusizo olukhulu engilekelela kokuningi noma sengimtshela ukuthi ngicabanga ukuvula inkampani yami, wangeseka kakhulu,” kusho yena.
Uthi njengoba ubesenesikhundla esisha emsebenzini, ebesimenza aphume ehhovisi, wabona ukuthi kunethuba eBulwer kwazise sasingekho isitolo esidayisa ukudla kwezilwane.
“Akekho ekhaya ebengibukela kuyena njengoba ngizalwa ngabazali abangafundile.
"Ngisho ngisazama ukungena ebhizinisini, abantu bebengayizwisisi le nto, bethi ngake ngabona bani odayisa ukudla kwezilwane, kuzothengwa ngubani ngoba leli bhizinisi lenziwa kakhulu ngabamhlophe.
"Indlela ibhizinisi ebelihamba kahle ngayo, bese ngizibona ngifana nezitolo okubalwa kuzo iTWK no-Epol eminyakeni ewu-5 ezayo kanti kuzokwenzeka le nhlekelele,” kusho yena.
Ugqugquzela nabanye abesifazane abanamaphupho amakhulu njengoba ukuthi bangalaleli okushiyo ngabantu emaceleni okuzobathena amandla, kodwa amehlo abo bawathi njo esicongweni.