Abagcwale ijele abafaka amanga ezinkundleni zokuxhumana
BAKWETHU, nginovalo ngathi siyindlu emnyama lapha eMany Cannibals Afrika.
Niyabona lezi zinkundla zokuxhumana ezafika, zazingadalelwe thina, yizinto nje zabelungu.
Kunalo mkhuba esesiwukopelile, owaqalwa ngabelungu benyundela izimbangi zabo ngamanga ezinkundleni zokuxhumana.
Ngangiye ngizwe kukhulunywa ngoBell Pottinger noStratcom, okwakuthiwa bafafaza amanga ngosopolitiki ukuze banuke iqaqa.
Manje-ke abantu bakithi sebeyithathile le nto bayenza umdlalo.
Yishwa nje ngoba nalo mthetho waseMany Cannibals Afrika ungaphuma u-number 5 kwi-race nonwabu, ufudu, yi-sloth nomnenke.
Kumele baboshwe abantu abafafaza amanga ezinkundleni zokuxhumana, hhayi kulokhu kuphathiswa ukuthi bazoboshwa.
Kanti ukubopha umuntu kuwumkhonzo yini bakithi? “We Lt Gen Khombinkosi Jula, ngicela ufonele kuJabul’ Ujule utshele uDudu
Khoza ukuthi ngiyakhoza ezigebengwini lapho eFinikisi nakoGlebelands,” kusho ungqongqoshe wamaphoyisa.
Kunabantu abahlalela izinkundla zokuxhumana ukuze baqambe amanga, kuthi nalaba abakhohlishwayo babakholwe.
Wena obachazela iqiniso, uphenduka iqaqa, bakuthuka ngamagama esiNgisi ayi-heavy weight o-naive, dipstick no-despicable ignoramus - uzizwele wena ukuthi ukube inhlamba iyanamathela, ngabe ufana ncimishi nomuntu otakulwe ethoyilethe lomgodi.
Kunaleli gama lesiZulu eliyinhlamba abalithandayo, okuthi uma libizwa ngezinye izizwe kube sengathi banika inkomazi i-instruction ukuba ikhalime ngokushesha… “moo soon!”
Laba bantu kabenqeni ukuthi kade uxoxela umngani wakho udaba, uthi: “Hheyi phela Hlabangane, ngithe ngizihambela nje ngahlanga nomfana womlungu wathi, ‘sayibona iRev Mkhekhelezi, gama lami yiSteven Makulakancane Smith. Ngithanda ibantu amnyama, angithandi belungu bahambe bethi: ‘nx’ angiyithandi ibantu abamnyama.’ Sibantu sonke…’ hhayi Mantshinga ungehlule lo mfana.”
Izinkomane-ke sezizokopolota lapho ngithi khona umlungu wathi: “Nx’ angibathandi abantu abamnyama zifake koFacebook, zithi:
“Bukani lo mnyamane othi akabathandi abantu abamnyama.”
Hhayi-ke nabalandeli bazo sebeyongithuka bengibiza ngesilima esikhotha amathe abelungu.
Bakhuluma njalo onkabi, kabayibonanga yonke i-video.
Hhayi futhi khona kwaTwitter nakwaFacebook! Abantu bakhona bahlale becasukile nje. Kuye kuthi noma sebekhonjiswa i-video ephelele, ubezwe bethi: “Hhayi suka, kasimsukeli lo mnyamana onguMkhekhelezi, vele ubonakala emehlweni nje ukuthi kwayena akabafuni abantu abamnyama.”
Abantu bakithi kabayiboni le nto yokuqamba amanga ezinkundleni zokuxhumana ukuthi iyingozi kanjani. La manga esiwaqamba koFacebook nakoTwitter ngoba sifuna ukujabulisa izikhulu ezithile noma osaziwayo, ayosibamba ngelinye ilanga, siyokhala ubumayemaye okwendoda edelelayo umfazi eseyibambe kahle ngempentshisi laphaya ngezansi.
Nathi bantu bakithi ake sinqabe manje ukuhlohlwa ngabantu abasuke benezinhloso zabo, bahubhuze amanga ezinkundleni zokuxhumna ngenhloso yokusenyusela ushukela.
Kufana nokuthi singadlala umuntu azenze inja kaPhuzekhemisi, uDlayedwa, adle amathenda yedwa, kuthi mhla unqamuka umbele wawo, usemema thina uthi: “Azikhale!” Never on a Sunday morning drinking coffee with a fork and knife, umuntu angabona isimanga lapha kimi. I-manna ingehlela abantwana baseMlazi uma engabona mina ngijoyina i-Azikhale Band. Umuntu akahambe ayozikhalisa yedwa njengoba wayedla yedwa, sibone ukuthi uyozimela yini uma sezimkhalela.
Hulumeni, angisakwethembi nakancane, kodwa awuke ungiphoxe nje ngibukwe yizwe, awusheshise indaba yokuboshwa kwabantu abaqamba amanga ezinkundleni zokuxhumana, kungenjalo leli zwe siyovuka seliphethwe ngu-Emerson Mnangagwa njengesifundazwe saseZimbabwe, kwazise nezobunhloli zakho zilala i-overtime.
Ngingasayiphathi-ke eyamaphoyisa njengoba abantu bebezitapela ezitolo, kwakungathi yila maphoyisa oZalo.
Ngithanda ukuzwakalisa ukudabuka kwami ngento eyenzeke ePhoenix, ibuhlungu, hhayi nje ngoba nakhu kwabulawa abantu abamnyama. Ukubulawa kwabantu ngisho nababezihambela nje!
Singabuye sithini-ke ngoba phela nohulumeni wethu uzophenya kuyoze kuvuke uSenzo Meyiwa azozibophela abantu abambulala.
Hikhensile ngopfu ma-Afrika!