Sizohlomulisa iningi isivumelwano se-EADP
Isikhungo sesikhiqize inqwaba yabasubathi abasezingeni
UMNYANGO wezeMidlalo waKwaZulu-Natal, oholwa nguHlengiwe Mavimbela ungene esivumelwaneni sokusebenzisana nePrime Human Performance, ngaphansi kohlelo i-Elite Athlete Development Programme (EADP).
I-EADP isiza abasubathi abenza kahle ukuba baziqeqeshe ePrime Human Performance ezinze eMoses Mabhida Stadium, eThekwini.
IPrime inika uqeqesho olusezingeni lomhlaba kubadlali abenza kahle emidlalweni yabo.
Izinhlangano zezemidlalo KwaZulu-Natal ziyaye zivundulule abasubathi abasethubeni lokuzuzela izwe noma isifundazwe izindondo emidlalweni emikhulu, bese bethola ithuba lokufakwa ngaphansi kohlelo i-EADP.
Lolu hlelo lusungulwe ngo-2013 kwathi ngo-2014 uMnyango wezeMidlalo waluxhasa ngemali ukuze lungafadalali. Kumanje i-EADP inabasubathi abangaphezulu kuka-123 abenza imidlalo eyahlukene ewu-18.
Nonyaka bawu-7 abasubathi abangaphansi kwalolu hlelo abayingxenye yama-Olympic Games aqhubeka eToyko, eJapan.
Phakathi kwabo kukhona uZakithi Zene, u-Anaso Jobodwana, uHenri Schoeman obuye nendondo kuma-Olympic adlule eBrazil, u-Erin Gallagher ukubala nje abambalwa.
Ngaphandle kwama-Olympic, ngokombiko okhishwe yiPrime, ithi uhlelo lwabo seluzuze izindondo eziwu-17 emidlalweni yomhlaba, ziwu-31 kwekazwelonke kanti ziwu-80 kweyezifundazwe.
UDennis Jackson ongumphathi we-EADP, uthi lolu hlelo lusiza ukunika abasubathi uqeqesho olusezingeni lomhlaba. Uthi abadlali abayingxenye yalo uma belimala belashwa ngodokotela abasezingeni eliphezulu.
"Inhloso ye-EADP wukusiza abasubathi esibalethelwe wuMnyango wezeMidlalo ukuba benze kahle emidlalweni yabo.
"Kuyasijabulisa ukubona abanye babo beyingxenye yama-Olympic Games anonyaka.
"Nginethemba lokuthi zikhona izindondo abazobuya nazo. Sijabule kakhulu ngobudlelwano esingene kubona nomnyango," kusho uJackson.
IPrime isiza abasubathi abaningi esifundazweni ngohlelo lwabo. Nabasubathi abenza kahle kwiComrades Marathon neDusi ngokwehlukana baziqeqesha kuso lesi sikhungo bexhaswe wuMnyango wezeMidlalo.