LIFANA NEKATI ELIBEKELWE UBISI NENYAMA IBHOKISA LAKULELI
UFANA nekati elibekelwe ubisi nenyama u-Ayanda Mthembu (osesithombeni) waseMandeni onethuba lokulwela amabhande amabili ahlukene nxa sekuxegiswe imithetho yokuvalwa kwezwe okudalwe wukubhebhetheka kweCovid-19.
UMthembu uyingqwele yeWBF Middleweight, kanti bekumele avikele leli bhande ngasekuqaleni kwalo nyaka KwaNongoma kwaphazamisa ukuhaqeka kwabanye ngeCovid-19 okuphethe ngokuthi kudlule emhlabeni uThulani “Nkunzi” Magudulela obehola iLudonga Boxing Promotions ebihlela lezi zimpi.
Ngaphezu kwalokhu, uMthembu ukleliswe endaweni yokuqala ezilinganisweni zabagaqele ibhande laseNingizimu Afrika leMiddleweight eliphethwe nguNkululeko Mhlongo waseShowe.
UZwilenkosi Magudulela okunguyena osehola iLudonga Promotions, uthe yize limqoka ibhande lakuleli, kodwa bafuna ukuvikela eleWBF kuqala.
“Ibhande leWBF lizosibeka ezingeni eliphezulu, futhi lizovula kalula indlela ebheke ezimpini ezinkulu. Abaphathi bakaMhlongo sike saxhumana nabo sabazisa ukuthi kuzomele balinde ngoba sifuna ukuvikela leli leWBF kuqala,” kusho uZwilenkosi.
Uqhube ngokuthi uKhumbulani Mdletshe osesitebeleni sakhe, ubheke ukulwa noThulani Mbenge oyingqwele yaseNingizimu Afrika kwiWelterweight. UMdletshe ukleliswe endaweni yesibili.
Kuvela ukuthi ikhempu kaMbenge ihlongoza ukutomula uMdletshe ukuvikela kuyena leli bhande. UMbenge usanda kuhlula uJabulani Makhense empini yeWBA Pan African Middleweight.
UZwilenkosi uthi kuzovulwa izwe sebezilungele zonke lezi zimpi.
“Sibuyele ejimini ngeledlule ngemuva kokugunyazwa ngumengameli wezwe. Sisebenza kakhulu uMthembu noMdletshe ngoba sizogadla ngabo nxa kuvulwa nje ezweni.
"Akhona namanye amabhokisa esiwakhulisayo ukuze siwahlelele izimpi ezizowenza anyuke ezilinganisweni zabagaqele amabhande ngaphansi kweBoxing South Africa,” kusho lo phromotha.
USizwe Mthembu nguyena osethathe ngokugcwele umsebenzi wokuqeqesha amabhokisa aseeThekwini Boxing Gym edla ngakhezo lunye neLudonga Promotions.