ISIYADUMA INDIZA YEQEMBU LIKA-U/23 EBUYA KUMA-OLYMPICS

ISIQALILE ukuduma indiza yesikwati sakuleli sika-U/23 esibambe iqhaza kuma-Olympic Games aqhubeka eTokyo, eJapan.

Lesi sikwati esilolongwa nguDavid Notoane sihlulwe yiFrance ngo-4-3 izolo ngeSonto emdlalweni wesibili ka-Group A eSatamai Stadium.

INingizimu Afrika iyivule kabi le midlalo ihlulwa ngosokhaya iJapan ngo-1-0 ngoLwesine.

Seyisalelwe wumdlalo owodwa ezobhekana kuwona neMexico. Ukuhlulwa emidlalweni emibili, kucente indlela yokuphuma ekuseni kulo mqhudelwano. Lesi sikwati sihambe sivele sihaqwe yizinkinga njengoba kuhoxiswe inqwaba yabadlali ekhempini ebiseMpumalanga. Siphinde sagqemeka enye ingozi kuvela ukuthi kukhona abadlali nesikhulu abahaqwe yiCovid-19.

Lesi sikwati kasenzanga kahle nakuma-Olympic edlule eBrazil. Selokhu sagcina ukwenza into ebonakalayo emidlalweni yango-2000 eSydney. Ngalesi sikhathi besicijwa ngu-Ephraim Mashaba.