BAHLUSHWA 'YINTSHA' EFUNA UKUDLA IPULAZI
IJULUKISA induna yesizwe saBatlokoa, eHimeville, indaba yeqeqebana labafana bendawo, elifuna ukungena ngendlakadla epulazini elinomlando kulesi sizwe, lithi umhlaba elakhiwe kuwona wadliwa ngesinxele ngabamhlophe koyisemkhulu.
UMnu Freeman Mjwara oyinduna yalesi sizwe esibhekwe yiNkosi Thabo Molefe, uthi kabusehli ubuthongo ebusuku, ngoba kabazi ukuthi abafana besizwe sabo babhe-nyisweni kulezi nsuku, bavutha bengabaselwe bafuna ukungena ngendlovuyangena epulazini iFord Inchgarth, elenganyelwe nguMnu David Ford.
Uthe leli pulazi bakhule likhona endaweni futhi miningi imindeni ephila ngalo.
ILANGA lithole ukuthi leli pulazi elinezisebenzi ezevile kweziwu-50, kutshalwe kulona izihlahla kwafuywa nezinkomo zobisi.
Usole inhlese yezepolitiki ecashile kuleli qeqebana athi ligqoka izikibha namabharethi abomvu, elingezwa muntu uma likhuzwa litshelwa nangomlando wepulazi.
“Sesizame izikhathi eziningi ukuhlala phansi nabo laba bafana kodwa kababoniseki. Kuyasixaka ukuphuma iqhubu nepulazi elilodwa abafuna ukungena kulona ngoba maningi akhona endaweni, kodwa balwa naleli elisondelene nemizi yabantu.
"Kuyimanje sebeqalile ukucekela phansi ezinye izakhiwo zasepulazini, sebentshontsha namasango banqamule nocingo olusebenza ngogesi.
"Sesihlala sibambe umoya, kasazi ukuthi sizovuka kunjani epulazini, kangangoba nomnikazi walo akasasithembi siwubuholi besizwe, ubona sengathi kasimvikeli ngokwanele,” kusho uMnu Mjwara.
Ekhuluma neLANGA uMnu Ford, uthe sebemkhathaze kakhulu laba abantshontsha ucingo lwakhe ngoba kuye kuthi uma esebopha izinkomo zabantu ezisuke zingene epulazini ngokungemthetho, kusuke omkhulu umsindo.
Ukuphikile okwenhlese yepolitiki, wathi uyabazi abaphehli bodweshu abasasazela abafana abancane ngokudla ipulazi.
“Nginohlu lwamagama abantu abaphambili ekudliweni kwepulazi lami elingamahektha awu-2 000.
"Kunogedleyihlekisa abakhuluma kamnandi uma sisemhlanganweni, abavumela phezulu ukuthi bazobakhuza laba abafuna ukudla ipulazi kanti ngemuva bangamashoshozela. Ngizolwa ngazo zonke izindlela ukuvikela leli pulazi.
Usuku nosuku ngivala izikhala ezisuke zivulwe ngabantu sebentshontshe ucingo,” kusho uMnu Ford.