KUTHOLWE IBHOKISI LITHUKUSWE EMFULENI
LITHOLWE ngamalungu omphakathi lithukuswe emfuleni eZimbokodweni, ngaseMlazi ibhokisi lomngcwabo likanokusho, okunezinsolo eziqinile zokuthi lebiwa ngesikhathi abantu betapa impahla, beshisa izakhiwo KwaZulu-Natal naseGauteng, emasontweni amabili adlule.
Leli bhokisi ebelibonakala ukuthi beligcinwe kahle, belithukusiwe eduze komfula, endaweni engajwayele ukuhamba abantu.
Amaphoyisa KwaZulu-Natal afake ekhasini lawo lezokuxhumana, eqinisekisa ukuthi litholakele leli bhokisi.
UNkz Nokulunga Cele (33), oyilungu lomphakathi okunguyena obone leli bhokisi lapho belithukuswe khona, uthi ubesendleleni eya edolobheni ngoLwesibili emini ngesikhathi ezithela kulona lisithwe ngezihlahla.
Uthi indlela ebelithukuswe ngayo, bekungelula ukuba umuntu odlulayo anake ukuthi yibhokisi lokungcwaba.
“Ngithuke ngacishe ngashayeka phansi sengiseduze nalo, ngenxa yokuthi bengingalindele ukuthi endaweni ebengihamba kuyona ngingazithela phezu kwebhokisi lomngcwabo.
"Ngiqale ngafikelwa wumcabango wokuthi linomuntu phakathi, kodwa kuthe uma sengingaseduze, ngabona ukuthi liselisha.
"Ngibuyele emuva ngishesha, ngayohlaba umkhosi. Sibuyele emuva sengihamba nabanye abantu, salivula. Bekungekho muntu phakathi, lihlanzekile, kubonakala ukuthi liselisha futhi kalikaze lisetshenziswe,” kusho uNkz Cele.
Utshele leli phephandaba ukuthi kwenzeka lokhu nje, amaphoyisa aseqalile ukugasela emizini yabantu eZimbokodweni naseFolweni, ethatha izimpahla asola ukuthi zatatshwa ezitolo.
UMnu Mbuso Khawula oyilungu lomphakathi, naye ozibonele leli bhokisi, uthi bathuke kwaphela nasozwaneni.
“Besike sezwa ukuthi kunabantu abatapa amabhokisi bayowathukusa emizini yabo. Yize singakatholi ukuthi ngubani lo obelivalele kwakhe, kodwa sekuyasicacela ukuthi ngumuntu wakhona la endaweni owenze le nto.
"Ulikhiphe leli bhokisi ngoba ebona amaphoyisa ephuma engena imizi yabantu, ethatha izimpahla ezatatshwa ezitolo nasezindaweni zabangcwabi," kusho uMnu Khawula.
Okhulumela amaphoyisa KwaZuluNatal, uCol Thembeka Mbhele, ukuqinisekisile ukutholakala kwebhokisi, wathi ligcinwe esiteshini samaphoyisa, kalikho icala elivuliwe.