UBALISA NGOKOPHA OKUNGAPHELI EMUVA KWENGOZI YEMOTO
UBALISA ngendlala yocansi owesifazane wakwaNdelu, ePort Shepstone, othi sekuphele iminyaka ewu-7 ebhekene nengwadla yokopha okungapheli esithweni sangasese, selokhu walimala engozini yeloli ngo-2015.
Lona wesifazane waseMzumbe, ukhulume neLANGA ngobuhlungu obusenhliziyweni yakhe selokhu washayiswa yiloli elaphaphalaza langena esitolo esisedolobheni ePort Shepstone, wathinteka kakhulu kwesingezansi.
Ucela noma ngubani ongasiza amelaphe kule nkinga ukuba amlekelele, njengoba ethi unanesilonda esibhibha ubusuku nemini.
Utshele ILANGA ukuthi usenolaka olwesabekayo ezeshelini uma zicela uthando ngoba uyazi ukuthi ekugcineni isoka azobe eliqomile, lizofuna bathokoze ngenkonzo yasekamelweni, okuyinto engelula ukwenzeka.
Uthi usephila ngokuphuma engena emitholampilo, kodwa akulungi.
Uthe kuye kwenzeke kunqamuke ukopha kubuye futhi sekugobhoza amahlule amnyama, elandelwa ngaluhlaza, anuka into engabekezeleleki.
“Kangisazi ukuthi ngenzenjani ukuze ngisizakale kulesi simo engibhekene naso. Ngangingakaze ngicabange ukuthi ngelinye ilanga ngiyobhekana nesimo esinzima kanjena, esiqeda ukuzethemba kumuntu wesifazane.
"Ngisola amanesi angazange alandele umyalelo kadokotela owathi mangidluliselwe egunjini labahlinzwayo, ngiyohlinzwa mhla ngilimele ngoba yena wayeyibonile inkinga esibelethweni sami,” kusho yena.
Uthe usezenze zonke izaba zokuzelapha njengoba nabelaphi bendabuko ubebasebenzisa, kodwa isimo singabuyeli kwesejwayelekile.
Uthe unamahloni okukhuluma ngalesi simo emndenini wakhe, usethembele kwiLANGA ukuthi lingaba wumkhulumeni wakhe ukuze athole umuntu ozomsiza.
“Sengikhathele wukuphila le mpilo.
"Ngenyanga ngiya kathathu ezinsukwini zami, lokho okungigqilazayo ngoba kangisebenzi, imali yokuthenga imisubelo kanginayo.
"Sengisizwa wukushintshanisa amathawula okugeza asephenduke imisubelo,” kusho uNkz Shinga.
UMnyango wezeMpilo KwaZulu-Natal, ucele ukuthunyelelwa imininingwane yalona wesifazane ukuze achaze ngokwenzeka.
Ube usuthembisa nokuxhumana nesikhungo ayelashwa kusona, kulandelelwe efayelini yakhe ukubheka uhlelo olwaluqhutshwa mhla elashwa.