Abazali mabagade amazwi abawasho ezinganeni zabo
INGANE nengane inekhaya lapho izalelwa khona, inabazali abayilethe emhlabeni, akukhathalekile ukuthi bashadile noma qha.
Ngokujwayelekile, kulindelekile futhi kuba kuhle ukuthi ingane ikhuliswe ngabazali bayo bobabili futhi abathandanayo, ukuze ikhulele esimeni esikhululekile, esifudumele nesigcwele uthando.
Iqiniso eliyilo kodwa liyakuveza ukuthi izingane eziningi kazikhuliswa ngabazali bendawonye njengobaba nomama.
Ezinye zikhulela ngaphandle komshado, ezinye zikhuliswe abazali abangomasihlalisane, ezinye zikhulela koninalume kanti ezinye zikhula zingahlali nhlobo nabazali bazo - bekude nazo.
Kwesinye isikhathi zikhula zihleli nabo bobabili beshadile, kodwa bengenakho ukuthula phakathi kwabo bobabili, bephila ngengxabano nokudonsisana phambi kwazo izingane.
Zonke lezi zimo izingane ezikhulela ngaphansi kwazo, ziba nomthelela othile ekukhuleni kwazo.
Phela amagama ezikhula eshiwo phambi kwazo, kumbe asuke eshiwo kuzona uqobo, ayakhela kuzona besekuthi ekusaseni lazo, abeyisibuko lapho zizibuka khona.
Zigcina zikhula zilandela lokho ezikhule kushiwo kuzona, kuphindaphindwa ezindlebeni zazo, bese kuqopheka ezingqondweni, ekugcineni kwakhe kuzona, lowo muntu oyokhula abe yila mazwi akhuliswe ngawo.
Othisha ezikoleni bangangifakazela ukuthi ingane kayibizwa ngamagama ayenza ilahlekelwe wukuzethemba ngoba lokho kuba nomthelela ongemuhle ekuphokopheleni kwayo phambili nempilo.
Eqinisweni nje, ingane ekhuliswa ngamazwi anokuyicwasa nokuyibukela phansi, iyalimala.
Iyakhula impela ngokomzimba, kodwa ibe inenxeba emqondweni nasemphefumulweni wayo, okuba nzima ukulelapha uma isikhulile.
Kwesinye isikhathathi lesi silonda siyihlupha kangangokuthi igcina isiyihlongandlebe, ibenenkani noma igcine ingena ezidakamizweni ngoba izama ukuzivikela nokuvikela imizwa nomphefumulo wayo kulezi zinto ezaqoshwa enqondweni nasemphefumulweni wayo ngalesi sikhathi isencane.
Isimo siba nzima kakhulu-ke uma lolu hlobo lwamazwi lwaluphuma kumzali wayo.
Uyaxoleleka umuntu ongayizali ngoba isuke inakho ukuthi “vele akuyena umzali wami, kumfanele ukusho izinto ezingezinhle ngami”.
Kodwa okuphuma emlonyeni womzali akusoze kwadlula, kunalokho kuyaqopheka emqondweni, enhliziyweni nasemphefumulweni wengane, ikhule inesilonda esiyodinga yena futhi lowo mzali ukuba asebenze ngokuzikhandla ukuze asipholise.
Okubuhlungu kakhulu kuba wukuthi umzali athi enganeni yakhe kayiyinto yalutho, iyisilima, ufisa sengathi ngabe akayizalanga, ifuze unina kumbe uyise ngobulima noma ngesici esithize noma ngokuziphatha okuthize.
Ewu ngiyakhuza bantu bakithi! Uma ukhuluma lezi zinkulumo enganeni yakho usuke uyithakathe wayiqeda, ulimaza ukuzethemba kwayo.
Empeleni uyayikhumula uyihambise nqunu phakathi kwabantu ngoba wena njengomzali ubedlula bonke abantu ngokubaluleka kuyo.
Umzali uyisisekelo sokuqala sokwakha impilo yengane yakhe, manje izinto azisho kuyo zibalulekile futhi ziyashesha ukuyithola indawo kuleyo ngane.
Yingakho uma lowo mzali esho okubuhlungu enganeni, kumane kunamathele kuyo ingunaphakade ngoba umzali ungumvikeli wayo, manje uma ekhuluma okulumelayo uyikhubaza okokugcina. Ivele ife ibe iphila.
Ngikhuza lo mhlola oyichilo nje, ngoba ekugcineni uma sekonakele ngempela, ingane ingasabambeki noma isihlukumeza ezayo izingane nabasondelene nayo, kube sekujahelwa ezinyangeni nasezangomeni kuyobhekwa ubuthakathi obubulale ingane, kanti umkhuba usesendeni okanye esibelethweni uqobo, hhayi ngaphandle kwesango.
Ngiyabanxusa bonke abazali ukuba bakugade abakukhipha ngemilomo yabo, bangazilimazi izingane zabo. Kunzima ukwelapha lesi silonda.
Umakhosi uNdleleni uMaZulu Insika (Isigodlo) UThishanhloko waseMatatane Secondary School bonamazulu@gmail.com Utholakala ku: 082 752 7342