Kusazothatha isikhathi ukuvusa umnotho
UKUHLASELWA kwamakhompyutha enkampani eyengamele amachweba aseNingizimu Afrika, iTransnet ngeledlule, kuyisikhumbuzo sokuthi izinhloli zakuleli kumele zenyuse amasokisi ukuvikela umnotho wezwe ekuhlaselweni ngalolu hlobo lwempi ngamanye amazwe noma imigulukudu.
Izolo iTransnet ibike ukuthi amachweba ayo aseqalile ukusebenza, yize kusazothatha isikhathi ukuthi abuyele esimeni esejwayelekile.
Isigameko saseTransnet sishiye amachweba ale nkampani engakwazi ukusebenza ngendlela ejwayelekile. Ukungena kwempahla kuleli, ivela kwamanye amazwe nokuphuma kwekhiqizwa kuleli iyothengiswa phesheya, kuhlelwa ngamakhompyutha.
Lokhu kuhambisana nezikalo zemali yentela ngabakwaSARS, okumele ikhokhwe yizinkampani ezingenisa impahla kuleli. Uma la makhompyutha equleka, njengoba kwenzekile ngeledlule, lo msebenzi uyama nse.
Lokhu kuphoqa abaphathi bamachweba ukuba babuyele endleleni yakudala yokusebenza, lapho izinkamnpani kumele zikhiphe amaphepha obufakazi ngezimpahla zazo.
Le ndlela ithatha isikhathi, okwenza ukungena nokuphuma kwempahla kubambezeleke, okungadalela umnotho wezwe izingqinamba.
Eyokuqala, ziningi izimpahla esezilungele ukuthengiswa ezitolo eziye zithengwe phesheya. Uma kunezingqinamba zokungena kwazo ngamachweba akuleli, kungagcina ngokushoda kwazo ezitolo.
Okwesibili, izinkampani ezithengisela amanye amazwe umkhiqizo wazo zingagcina sezilahlekelwe ngamakhasimende uma umkhiqizo wazo ungafiki ngesikhathi okuvunyelwene ngaso.
Ukuhlaselwa kwamakhompyutha ezinkampani ezizimele neminyango yohulumeni ngale ndlela, sekuyinto ejwayelekile emhlabeni wonke. Sekukaningi amabhizinisi neminyango kahulumeni e-United States of America (USA) nakwamanye amazwe behlaselwa ngale ndlela.
I-USA ihlale ikhomba izimbangi zayo okubalwa kuzo iChina, iRussia, iNorth Korea nemigulukudu ezimele.
Lokhu kuhlaselwa kwamakhompyutha kusuke kuhloswe ngakho ukuphazamisa ukusebenza komnotho wezwe.
Kwesinye isikhathi abahlaseli bamakhompyutha basuke befuna ulwazi olunzulu oluqukethwe yile mishini, bese beluntshontsha. Zimbili izizathu zokuntshontsha ulwazi, esokuqala; wukuthola izimfihlo ngokusebenza komnotho wezwe - osekungenye yezindlela amazwe ancintisana ngayo.
Eyesibili; nezinkampani ngokunjalo, zusuke zizama ukuthola izimfihlo ngezinkampani ezincintisana nazo ezimakethe. Izinkampani ziyaye zithande ukwazi ukuthi ozakwabo beza nani entsha engabatholela amakhasimende.
Lokhu kuhlaselwa kwamakhompyutha kubuye kusetshenziswe ukukhubaza umnotho wezwe noma ukusebenza kwenkampani ethile.
Uma kuyinkampani ekhutshazwayo, abahlaseli basuke befuna ukuthi ihluleke wukugcina izidingo zamakhasimende ayo, okungavula amathuba okuthi izimbangi zayo zikwazi ukuheha la makhasimende.
Ngakolunye uhlangothi, abahlaseli abazimele baye bafuna inkokhelo ukuze bayeke ukuhlasela. Abanye kabafune mali, kodwa balwa impi nenkampani ethile ngoba bephikisana nendlela esebenza ngayo.
Umkhandlu oweluleka uMengameli wase-USA ngesimo somnotho wezwe, waludingida lolu daba lokwanda kwempi ngamakhompyutha embikweni wawo ka-2018. Wathi impi yamakhompyutha idala umonakalo emnothweni.
Lo monakalo uba mkhakha mibili, omunye usheshe ubonakale, kanti omunye uthatha isikhathi. Osheshe ubonakale ungaxuba ukulahleka kolwazi oluyimfihlo nemali engenayo.
AbaseTransnet kabakacacisi ukuthi nhloboni yokuhlaselwa kwamakhompyutha abo ababhekene nakho, kanti nohulumeni kawukaze usikhiphe isitatimende esicacisa ngalokhu.
Nokho kunezinsolo zokuthi lokhu kuhlasela kuphathele nemizamo yokukhubaza ukusebenza komnotho wezwe.
Ibalulekile iTransnet ekusebenzeni komnotho wakuleli, ichweba laseThekwini liwumgudu wezimpahla ezibalelwa ku-60% ezingena neziphuma kuleli.
Okwesibili, amachweba akuleli awumgudu wezimpahla eziya emazweni ase-Afrika esingabala kuwona iZimbabwe, iZambia, neDemocratic Republic of the Congo.
La mazwe kawanawo amachaweba awo ngoba amaphakathi nezwekazi, lapho lungekho ulwandle. Ichweba laseRichards Bay liwumgudu omkhulu wamalahle akuleli athengiswa phesheya.
Ukumiswa kokusebenza kwechweba laseThekwini kuzoba nomthelela ongemuhle ezinkampanini zakuleli njengoba kulandele maduze nje ekuvalweni kwaleli chweba ngenxa yodlame nokuntshontshwa kwempahla ezitolo obekukhungethe iKwaZulu-Natal neGauteng.
Lolu dlame lwahambisana nokuvalwa komgwaqo omkhulu oxhumanisa iTheku neGoli, owumgudu omkhulu wezimpahla eziphuma nezingena ngechweba laseThekwini.
INingizimu Afrika kayifani namanye amazwe lapho ololiwe kuyibo abathwala impahla eningi. Sekuneminyaka eminingi impahla eningi yakuleli ithwalwa ngamaloli, okwenza umnotho ubesengcupheni uma ukuhamba kwamaloli kuphazamiseka.
Sikhuluma nje izinkampani ezizimele ziphezu kwemizamo yokuvuselela ingqalasizinda yohwebo njengezitolo nezindawo zokubekwa kwempahla eyacekelwa phansi ngesikhathi sezibhelu zokutatshwa kokudla.
*