Ukhathazekile ngabangafuni ukugoma
UZikalala unxusa izimeya, amakhosi, amakhansela nezinduna ukukhuthaza abantu bayogoma
UZWAKALISE ukukhathazeka ngabantu asebekhulile, abangafuni ukuyogomela iCoronavirus, uNdunankulu waKwaZulu-Natal, uMnu Sihle Zikalala, ogqugquzele izakhamizi zakulesi sifundazwe ukuba ziphume ziyogoma njengoba naye ebegoma ngoLwesibili ehholo lomphakathi Inkosi Mzondeni, KwaMsane, eMtubatuba.
UMnu Zikalala oyinxusa lentuthuko eMkhanyakude - okuwumasipala omkhulu uMtubatuba ongaphansi kwawo - ubehambisana noNgqongqoshe wezeMpilo KwaZulu-Natal, uNkk Nomagugu Simelane-Zulu neMeya yaseMtubatuba, uMnu Thobelani “Verus” Ncamphalala, nayo egomile ngalolu suku.
Ube ngumuntu ka-1,186 562 KwaZulu-Natal ukuthola umgomo selokhu uhlelo lokugoma lwaqala ngoNhlangulana (February) nonyaka.
“Bese siside kakhulu isikhathi ngilinde ukugoma. Bengilinde laba abaseminyakeni yami ukuze ngigome nabo,” kusho yena.
Unxuse abantu baKwaZuluNatal ukuba babhalise bese bephuma ngobuningi babo bayogoma. Uncome abantu baseMkha-nyakude abaneminyaka ewu-60 kuya phezulu ngokusabela ekhwe-lweni lokuba kugonywe, wathi asebegomile badlulile esibalweni abebesilindele.
Ngesikhathi uhlelo lokugoma luqala, kwavuleleka abaneminyaka engaphezulu kuka-60 kuya phezulu, kwalandela abaneminyaka engaphezulu kuka-50 njengoba manje sekuvumeleleke noma ngubani oneminyaka esukela ku-35 kuya ku-49.
“Njengamanje silungiselela ukuqala sigome intsha, ngakho-ke siyacela ukuba laba abaneminyaka engaphezulu kuka-35 baqale baye ngobuningi babo ezikhu-ngweni zokugoma kulesi sifundazwe. "Sicela ukuthi uma bezogoma bangabashiyi abazali noninakhulu uma bengakagomi. Kubalulekile ukuba sizinakekele, sivikele abasondelene nathi,” kusho yena.
Ngemuva kokugonywa, uthe akukho okuhlukile akuzwile emzimbeni wakhe. UMnu Ncamphalala uthe kubalulekile ukuba abaholi bahambe phambili, babe yisibonelo esihle.
“Nginxusa izimeya, amakhosi, amakhansela nezinduna ukuba bahambe phambili ekudluliseni umyalezo kubantu bethu ukuba baphume bayogoma. Siyabonga nangeqhaza asebelibambile ekudluliseleni umyalezo,” esho.
UNkz Simelane-Zulu uthe kusukela mhla lulunye kuMandulo (September), kuzobe sekugoma bonke abanemiyaka engaphezulu kuka-18.
“Njengoba umengameli wezwe (uMnu Cyril Ramaphosa) esememezekile, siyanxusa ukuba intsha iqale ibhalise ngobuningi bayo ngoba okuhle ngayo wukuthi iyakwazi ukwenza izinto ngezobuchwepheshe,” kusho yena.
Uthe nabangakabhalisi, abafisa ukuyogoma, ngeke baxoshwe, bazobhaliswa bese beyagonywa kodwa uma befika sebebhalisile, kwenza izinto zibe lula kungagcini kunolayini abade.
Siyanxusa ukuba intsha iqale ibhalise ngobuningi.