OlwePSL neRoyal AM kweyoMthethosisekelo
Kuthiwa uShauwn Mkhize uzimisele ngokulwa kunqamuke izandla
KUBUKEKA sengathi izogcina eNkantolo yoMthethosisekelo impicabadala yempi eqhubekayo phakathi kweRoyal AM nePremier Soccer League (PSL).
ILANGA lithole ukuthi i-AM kayizimisele ngokwehlela ngezansi kumdonsiswano oqhubekayo phakathi kwayo nePSL ngelungelo lokudlala kwiDStv Premiership ngesizini ezayo ka-2021/22.
I-AM ichithwe yicala ebilifake enkantolo yaseGoli ngoMsombuluko, lapho ibisola khona uMato Madlala oyisikhulu esiphezulu esibambile kwiPSL ngalokho ekubiza ngokwedelela umyalelo wenkantolo, ngokuvumela ukuqhubeka kwemidlalo yama-play offs enqotshwe yiChippa United.
I-AM ithi isadla amathambo ekhanda ngokuqhuba leli cala elifake ngoMato.
Inkankanya indaba kaMato nje, ivele inodaba esalinde ukuthola usuku lokungena kwalo elifake eNkantolo yokuDluliswa kwamaCala eBloemfontein ngesinqumo seJaji uRonald Sunderland sokuvuna isinqumo sikamahluleli ozimele uHilton Epstein sokuthi iSekhukhune United yiyona eyizingqwele zangesizini edlule zeGladAfrica Championship.
Leli phephandaba libone ikhophi yencwadi i-AM eyibhalele abammeli benkampani iWebber Wentzel Attorney’s, iyazisa ukuthi izimisele ngokuluqhuba lolu daba luze luyofinyelela kule nkantolo yokugcina kuleli uma ubulungiswa bungakenzeki. Ikholwa wukuthi yasuswa endaweni yokuqala ye-log yeGladAfrica Championship ngendlela engekho emthethweni.
Le ndawo yathathwa yiSekhukhune emuva kokuba ivunwe yicala eyayilifake kumahluleli ozimele, u-Epstein lapho yayifuna ukunikwa amaphuzu amathathu omdlalo wayo nePolokwane City owawungoMasingana (January).
Kulo mdlalo iPolokwane yaphula umthetho wePSL othinta ukusetshenziswa kwabadlali abaneminyaka engaphansi kwewu-23 ubudala.
Lokhu kuqinisekiswe nguRichard Makhoba oyiMenenja ye-AM ephethwe nguShauwn Mkhize okuthiwa ushaya phansi ngonyawo ukubuyela kwiGladAfrica ngoba ekholwa wukuthi lesi sigaba wasinqoba ‘emini libalele wase egudluzwa esicongweni ngobumnyama’.
UMakhoba uqhube ngokuthi nakuba kusenala macala abawafakile kodwa bazosihambela isigcawu sokuqondiswa izigwegwe esibizwe yiPSL ngoMgqibelo.
Lesi sigcawu sesihlehliswe amahlandla amabili ngoba kukhalwa ngokuthi ngeke benzeke ubulungiswa uma sihlala engakaphothulwa amacala afakwe yi-AM.