KUNKENTEZE AMAZWI KAMOTAUNG NGEJEZI
UKHUMBULE inkulumo kaKaizer “Shintsha Guluva” Motaung amamukela ngayo kwiKaizer Chiefs ngesikhathi enikwa ijezi eliwunombolo 10 u-Absalom “Scara” Thindwa (osesithombeni) okwagcina ngaye ukuthi le nombolo ihlonipheke kule kilabhu.
Ubephawula emuva kokuba le nombolo ehlonishwa umhlaba wonke inikwe uKeagan Dolly osayine inkontileka yeminyaka emithathu eziMpofaneni emuva kokuba ehlukane neMontpellier yaseFrance.
Wethulwe noCole Alexander osuka kwi-Odisha FC yase-India futhi oke wasebenza noStuart Baxter osepheka iChiefs.
UThindwa uthi unethemba lokuthi uDolly ngeke limesinde leli jezi ngenxa yesipiliyoni anaso njengoba esebuya nase-Europe.
“Ubumqoka bale nombolo kwangicacela ngesikhathi ngijoyina iChiefs ngoba uMotaung weza kimina wathi kumele ngiliqaphele ngoba linengcindezi enkulu. Wangidonsa ngendlebe ukuba ngingalokothi ngilithathe kancane,” kusho uThindwa owayengalibheki ipali kwiChiefs ayijoyina maphakathi nama-80’s.
Kubadlali abagqoka leli jezi ngemuva kukaThindwa kwiChiefs kodwa kwacaca ukuthi liyabesinda kukhona kubona uSiyabonga Nkosi, uMichael Nkambule, uSongwe Chalwe, uTony Illodigwe, uMthokozisi Yende, uKeagan Buchanan noSiphelele “Stash” Ntshangase okuyimanje usantula ikilabhu emuva kokuxoshwa yiziMpofana.
Umdlali owazama ukulibamba leli jezi ngu-Isaac “Shakes” Kungwane ongasekho.
UThindwa uthi nguKungwane kuphela ongazange aphoxe emuva kwakhe ngesikhathi enikwa leli jezi eligqokwa yizilomo kuwona wonke amakilabhu kanobhutshuzwayo umhlaba wonke.
UThindwa uthe ubheke ukuba iChiefs yenze kahle kakhulu njengoba isayinise laba badlali.
“Kuyathembisa ngoba ikwazile nokugcina abanye abadlali abanesipiliyoni njengo-Itumeleng Khune benoBernard Parker abamqoka ekhempini ukufaka imfundiso kulaba abasakhula,” kusho uThindwa.
UDolly uzwakalise ukuthi ngendlela abeyithanda ngayo iChiefs esakhula ubenza izitayela ebezikhonzwe ukugundwa nguJabu “Pule” Mahlangu ngesikhathi esalihlikihla kule kilabhu. Uthi ukulungele ukuliphatha ngesinono leli jezi.
Abanye abadlali abavuselele kwiChiefs nguRamahlwe Mphahlele, uParker, uLebogang Manyama ukukha nje phezulu. IChiefs ikhulule uPhilani Zulu noWillard Katsande.