LUZAMA UKUPHESHA IZIMBOBO UTHONGATHI FC
LUSAYINISA abadlali abamqoka uThongathi FC olugijima kwiGladAfrica Championship emuva kokuba lulahlekelwe yinqwaba yabadlali abaqome amakilabhu agijima kwiDStv Premiership.
Le kilabhu izovula isizini entsha ngomdlalo neHungry Lions emdlalweni ohlelelwe umhla ka-21 kuNcwaba (August) eSivos Training Stadium, eNorthern Cape.
ILANGA lithole ukuthi le kilabhu isayinise uNgunezi Mkhize (osesithombeni) okhuliswe yiLamontville Golden Arrows futhi owake wadlala kwiRoyal Eagles kaS’bu Mpisane, uMfanafuthi Mkhize osuka eqenjini elincane le-Arrows, uPhila Dlamini noFalakhe Tshanini obekuMvoti FC.
Le kilabhu izama ukuvala izikhala ezisanda kuvuleka kuhamba uXolani S’lawula othathwe yiTS Galaxy, uSaziso Magawana oqome i-Arrows ukubala nje abambalwa.
Kuzo ezalesi sigaba, iHungry Lions iqashe uGert Schalkwyk njengephini likaHenry Basie ohola ithimba labaqeqeshi bale kilabhu. Ibuye yanika uMoses Spandeel ithuba lokungena ethimbeni labaqeqeshi emuva kokubeka amakhokho ethala.
UKhehla Shabalala obeyisiqongqwane kwiDabeka Sporting egijima kwiSafa KZN ABC Motsepe League uqome iRichards Bay FC.
I-TS Sporting isayinise u-Edward Maova osuka kwiCivics FC yaseNamibia, uSamkelo
Mbambo ophuma kwiFree State Stars, uFelix Obada weLeruma United, u-Olwethu Ncube obekwiJDR Stars, uBoiki Modisakeng owake wadlala kumaZulu FC noOnyedikachi Ononogbu obekwiBlack Leopards.
Uhlu lwemidlalo yokuqala yeGladAfrica Championship oluputshukile lumi kanje:
NGOMGQIBELO womhla ka-21 kuNcwaba
EThohoyandou: Black Leopards vs Polokwane City 15h00.
ESivos: Hungry Lions vs uThongathi FC 15h00.
EGiant: JDR Stars vs Tuks 15h00.
EChatsworth: Royal AM vs Cape Town All Stars 15h00.
KaBokweni: TS Sporting vs Pretoria Callies 15h00.
NGESONTO mhla ka-22 EParow Park: Cape Town Spurs vs Venda Football Academy 15h00.
EGoble Park: Free State Stars vs Polokwane City Rovers 15h00.
ETsakane: Jomo Cosmos vs Richards Bay 15h00.