Kuyalibhedela elakuleli kuma-Olympics eJapan
Kuhamba ngolonwabu ukuhlabana ngezindondo
KUHAMBA ngonyawo lonwabu ukuhlabana ngezindondo kubasubathi abamele elakuleli kumaOlympic Games aqale ngoLwesihlanu olwedlule azosongwa ngomhla ka-8 kuNcwaba (August) eJapan.
Kushone usuku lwayizolo iNingizimu Afrika isenezindondo ezimbili nje kuphela ezitholwe nguTatjana Schoenmaker (osesithombeni) ohlomule ngendondo yesiliva kwi-100m breaststroke.
Bekuyindondo yokuqala yezwe. Lo mbhukudi wenze kahle kakhulu emidlalweni yokuhlunga. Wenze irekhodi lama-Olympic kwi-100m okuwu-1:04.82. Kuthe izolo waphinda waphula irekhodi le-200m kule midlalo ebeka u-2:19:16.
Uhluleke ngemizuzwana eyisihlanu ukwenza irekhodi lomhlaba. Namuhla ngoLwesine ekuseni uzokube esemidlalweni eyandulela owamanqamu kwi-200m.
Omunye umsubathi ohlomule ngendondo nguBianca Buitendag othole eyesiliva kwiSurfing. Ngemuva kokuhlabana kwakhe ngendondo uBianca utshele abezindaba ukuthi usethi khumu kulo mdlalo.
INingizimu Afrika ihlomula ngalezi zindondo nje, uChad le Clos obuye nendondo yesiliva kwi-100m butterfly ngo-2016 eBrazil, izinto kazimhambelanga kahle kwi-200m butterfly ephuma endaweni yesihlanu kweyamanqamu. Lisekhona ithemba lezindondo kuChad noTatjana njengoba kusenemidlalo abasazokuba yingxenye yayo.
Iqembu lakuleli lebhola lombhoxo leRugby Sevens, liyiqale kahle imidlalo yamaqoqo kodwa lakhishwa yi-Argentina sekusele kancane ukuba lingene kweyamanqamu. INingizimu Afrika ibukeka ingeke ikwazi ukuthola izindondo ezilishumi, ezilingana nezango-2016 eBrazil. Kuzokuthi kusasa ngoLwesihlanu kuqale ezokugijima lapho kubhekwe khona ukuthi kube khona abagijimi ababuya nezindondo.
Iqembu lebhola lezinyawo lakuleli lika-U/23 kalenzanga kahle njengoba liphume ekuseni kulo mqhudelwano.
UHenri Schoeman obuye nendondo eBrazil kwiTriathlon, akawuqedanga umdlalo wakhe nonyaka. Amanye amaqembu akuleli kawakwazanga ukufika kweyamanqamu.
Kusenjalo, iqala ngoMgqibelo i-The Icon’s Journey Marathon yebanga lika-400km ehlelelwe ukusiza abafundi abawu-4000 ngemifaniswano yesikole. Lo mjaho bekufanele ukuba ugijinywe ngenyanga edlule kodwa wagcina uhlehlisiwe ngenxa yokungena kwezwe ku-level 4. Uzogijinywa ngabasubathi abawu-16 kuphela kanti umgijimi uzoqoka isikole afuna ukunikela kusona ngomfaniswano.
Lo mjaho uzogijinywa izinsuku eziwu-8 kwenziwa u-42km kuthi ngolokugcina kwenziwe u-103km. Uzokube uhamba lapho okwazalelwa khona amaqhawe omzabalazo adabuka e-Eastern Cape. Abafuna ukunikela bangangena kwi-website ethi: wwwbackabuddy.co. za/400kmiconchallenge.