Kuphenduke amatafula ngeCarling Cup
UNurkovic udlule uKhune ngokuba yisithandwa sabeChiefs
KUVELA isizathu esenze uKeagan Dolly (osesithombeni) waqoma ukusayina kwiKaizer Chiefs ekubeni bekunamakilabhu abemgaqele asemazweni ahlukene kubalwa eSaudi Arabia, e-Egypt, eTurkey naseFrance.
Imenenja yalo mdlali, uPaul Mitchell, iveze ukuthi okwenze waqoma iChiefs wukuthi usefuna ukuzinza kuleli njengoba esehlela ukuqala umndeni.
Uthi usanda kuthola umntwana kanti ubengasitholi nesikhathi esikahle sokuqala amalungiselelo omshado njengoba esefuna ukuthatha.
Uthe babone ukuthi uma elibangisa phesheya kuzonyomfeka izinhlelo zakhe zokwakha umndeni kuleli.
UMitchell uthi okunye okwenze baqoma iChiefs wukuthi abaphathi bale kilabhu babanike inkontileka ebiconsisa amathe, obekunzima ukuyenqaba.
Uthi kuyiqiniso ukuthi i-Al Ahly yase-Egypt ibathumelele incwadi ngeSonto ekuseni ekubeni bebevele behleli nezinye izicelo kubalwa nebesisuka nakwiZamalek yakulona leliya lizwe.
“Empeleni i-Al Ahly beyingaqali ukumfuna njengoba ngake ngakhuluma nayo ezinyangeni eziwu12 ezedlule nge-zoom kodwa izingxoxo zangaba nawo umphumela ogculisayo.
"Sike sacabanga neyaseTurkey kodwa sajika umqondo njengoba amakilabhu amaningi eshayekile ngenxa yeCovid-19.
“Ngeke ukwazi ukuhambisa umdlali wakho ekilabhini okubuye kuvele izindaba zokuthi abadlali babuye bangaholi. Yizona zonke izinto obekumele siziqaphele,” kusho uMitchell ohlelweni lweSAfm.
Le menenja ikuphikile ukuthi uDolly useyisixhwala, ulimala njalo. Ithe uDolly uhambe kwiMontpellier esegijime amahlandla awu-35 ngesizini edlule kubalwa nemidlalo yezinkomishi.
Lo mdlali angase aqale ukubonakala edlubhe ijezi leChiefs ibhekene ne-Orlando Pirates kwiCarling Black Label Cup ngeSonto ngo-17h00 e-Orlando Stadium, eSoweto.
Nakuba lo mdlalo ugijinywa ngabadlali abasuke bevotelwe kakhulu kodwa abasha bayakwazi ukungena ngokuqhubeka komdlalo.
IChiefs izovula imidlalo yeDStv Premiership ngokududulana neTS Galaxy ngomhla ka-22 kuNcwaba (August) eMbombela Stadium, eMpumalanga.
UKHOMBISE ukuba yisilomo sabalandeli beKaizer Chiefs uSamir Nurkovic waseSerbia eqwaqwada bonke abadlali ngokuthola amavoti amaningi ukuqala umdlalo weCarling Black Label Cup abazowugijima ne-Orlando Pirates ngeSonto ngo-17h00 e-Orlando Stadium, eSoweto.
UNurkovic uwole amavoti awu-193 000 kwathi isibili kwaba nguItumeleng Khune ngawu-188 467 kanti
uKhama Billiat ubambe isithathu ngawu-131 527.
Phambilini uKhune ubehlale ezidlela amahlanga ngokuthandwa ngabalandeli bale kilabhu njengoba uNurkovic ephendule amatafula nonyaka.
KwiPirates umdlali ovotelwe kakhulu nguThabang Monare ojoyine le kilabhu ngasekuqaleni kwesizini edlule.
Uthole amavoti awu-133 590.
UMonare ulandelwe nguRichard Ofori ngamavoti awu102 150 kanti isithathu kube nguThulani “Tyson” Hlatshwayo ongukaputeni wale kilabhu othole awu-76 862. Okuqaphelekayo wukuthi bobathathu laba badlali abahambe phambili ngamavoti kwiBucs, bazokube beqala ukugijima kulo mdlalo njengoba bejoyine le kilabhu ngasekuqaleni kwesizini
edlule.
Lo mdlalo kawubanga khona nyakenye ngenxa yokubhidlanga kweCovid-19 esabhilitile namanje okwenza abalandeli bangavunyelwa ukuhambela imidlalo. Ukuhlasela kwalo mkhuhlane kushaye nabaxhasi ngoba utshwala bebuvaliwe ukudayiswa kuleli okwenze amavoti kawaze angena ubuthaphuthaphu ngoba ukuze uvote bekumele uthenge ubhiya bese ufaka inombolo engaphansi kwesivalo. Sesisonke isikimu esizoqala umdlalo kwiChiefs simi kanjena: uSamir Nurkovic (193 766), u-Itumeleng