ISalga iqoke ubuholi obusha e-KZN
Ikhethwe ngo-elethu iMeya uThami Ntuli
LUXAZULULWE kuzwelonke olokuqokwa kobuholi obusha benhlangano yohulumeni basekhaya esifundazweni KwaZuluNatal, ebhekelela ukusebenza kwabo bonke omasipala.
Iqokwe ngokungabangiswa imeya kaMasipala iKing Cetshwayo, uMnu Thamsanqa Ntuli, esikhundleni sokuba nguSihlalo weLocal Government Association (Salga), emuva kokuba amalungu amabili abephakanyisiwe, ehoxile.
UMengameli we-Salga kuzwelonke, uMnu Bheki Stofile, obehamba nesekela lakhe engqungquthele ebiseCivic Centre, eMhlathuze ngoLwesihlanu, ukuqinisekisile engxoxweni naleli phephandaba ukuthi akukho okungayenza iqale phansi ingqungquthela, ukhetho luhambe kahle.
“Ubuholi obuqokiwe buyibona. Kulandelwe yonke imigomo efanele yokukhetha futhi senze isiqiniseko ukuthi kazikho izinkinga. Sibuphasisile ubuholi obuphakanyisiwe,” kusho uMnu Stofile.
Lolu khetho bese luphindwa okwesithathu emuva kokuba luchithwe kuzwelonke eCape Town, sangavunyelwa isifundazwe ukubamba iqhaza engqungqutheleni kazwelonke ngenxa yokuthi i-ANC, ibhalele uzwelonke ithi akulandelwanga imigudu efanele ekuqokweni kobuholi KwaZuluNatal.
NgoMasingana (January), ukhetho lokuqala olwaluse-Inkosi Albert Luthuli International Convention Centre, (ICC), eThekwini, kaluphumelelanga ngoba amalungu e-ANC athi ngeke luqhubeke uma ungekho umthetho sisekelo wenhlangano obhalwe ngesiZulu, isiXhosa ne-Afrikaans.
Kwabekwa izinsuku eziwu-21 ukuba luqalwe phansi ukhetho ngoNhlolanja (February), nakhona lwaba nezinkinga amalungu e-ANC eyiduba ingqungquthela.
Lokhu kwenze ukuba ukuqokwa kobuholi obaqokwa bengasekho abadubile, buchithwe kuzwelonke.
UMnu Ntuli, useqokwe kwaze kwaba kathathu kulesi sikhundla selokhu kuqale ukungaphumeleli, kwemihlangano, ichithwa yi-ANC. Abaqokwe kwesobusekela yikhansela laseThekwini uNtombifuthi Gumede, imeya yaseNewcastle uMnu Xolani Dube, nemeya yasoPhongolo uNkz Velephi Sikhosana.
Amanye amalungu enhlangano aqokiwe, imeya yasoThukela iNkosi uNtandoyenkosi Shabalala, imeya yaseMajuba uNkk Veronica Bam, usomlomo kuMasipala waseZululand, uDT Memela, imeya yasoLundi uMnu Wilson Ntshangase nemeya yaseMlalazi, uNkk Queen Xulu.
Abazomela isifundazwe kuzwelonke, imeya yaseMhlathuze uMnu Xolani Ngwezi, eyaseBaqulusini uMnu Mncedisi Maphisa, eyaseMzinyathi uMnu Petros Ngubane nabanye.
Imizamo yokuthola uMnu Ntuli, kayiphumelelanga kodwa enkulumeni yakhe yangaphambilini, uthembise ukuthi bazoqinisa kakhulu amatomu kulo msebenzi weminyaka emihlanu besehhovisi.