UNQANYULELWE UMHOLO OBEYIMENENJA EMKHANYAKUDE
UNQANYULELWE iholo lakhe obeyimenenja kaMasipala eMkhanyakude, abameli bakhe bathumelela imeya, nemenenja ebambile, incwadi ephoqa ukuthi akhokhelwe ngaphambi kokuba kuphele usuku lwanamuhla ngoMsombuluko.
Abameli baMnu Mxolisi Nkosi, bathumele incwadi kwiMeya uMnu Siphile Mdaka, nemenenja ebambile, uDkt Siyabonga Ntuli, bethi kumele abuyiselwe emsebenzini, aphinde akhokhelwe iholo lakhe ngemuva kokuba engaholanga kule nyanga, ngoba ubuholi buthi kabunayo inkontileka naye.
ILANGA libikile ngodaba lukaMnu Nkosi, ngesikhathi eveza ukuthi inkantolo yaseMgungundlovu imthole engenacala, futhi usekulungele ukubuyela emsebenzini kumnyama kubomvu.
Leli phephandaba liphinde laveza ukuthi kube nomhlangano phakathi kwakhe uMnu Nkosi noMnu Mdaka, bavumelana ngokuthi amnike isikhathi ukuthola kabanzi ngodaba lwakhe ngoba naye ubesanda kubekwa esikhundleni.
Lo mhlangano kuthiwa ubungomhla ka-14 kwephezulu, lapho uMnu Mdaka, ecele ukunikwa isikhathi esingangesonto. Isonto abelicelile beliphela ngoLwesihlanu lomhla ka-25 kwephezulu.
NgoLwesine mhla ka-24 (kuyo le nyanga) kuyavela ukuthi uMnu Mdaka, ubhalele uMnu Nkosi, ephendula incwadi yakhe abebika kuyona ukuthi ngomhla ka-23 kuNhlolanja (February), inkantolo imthole engenalo icala, ngamacala abebekwe wona nguMnu Bamba Ndwandwe, onguMlawuli kulo masipala nomkhandlu wawo.
Kule ncwadi ILANGA eliyibonile, uMnu Mdaba ukubeka kucace ukuthi ngokolwazi abanalo kwamasipala, kuyavela ukuthi uMnu Nkosi uqashwe kuwona mhla lulunye kuNdasa (March), ngo-2019.
Inkontileka yakhe iveza ukuthi yanqanyulwa ngomhla ka-28 kuNhlolanja (February) wonyaka odlule.
Ilapho abe esemtshela khona ukuthi isicelo sakhe sokubuyela emsebenzini njengemenenja kulo masipala akakwazi ukusamukela.
Ube esembonga ngomsebenzi awenzile, waphinde wamfisela ikusasa eliqhakazile.
ILANGA liphinde labona incwadi ebhalelwe onogada bakulo masipala ukuba bangamvumeli uMnu Nkosi emahhovisi, okungumyalelo womkhandlu. Le ncwadi nayo ibhalwe ngoLwesine lwangomhla ka-24.
Encwadini yabammeli bakaMnu Nkosi, bakhwela bayadilika kulo masipala bethi incwadi ebhalelwe uMnu Nkosi ukuthi akadingeki emsebenzini ngoba kade yanqanyulwa inkontileka yakhe, imehlisa isithunzi futhi kayikho emthethweni njengoba inkontileka yakhe iyoze iphele ngomhla ka-31 kuMfumfu (October) kulo nyaka.
Ithi njengoba ubuholi obusha kulo mkhandlu bubekwe ngomhla ka-9 kuLwezi (November), inkontileka yakhe iyoze iphele ngemuva konyaka emuva kokubekwa kobuholi obusha, okuyinto abathi isenkontilekeni yokuqashwa kwakhe.
Bathi lokhu bakusho nje ngoba kwavela enkantolo ngesikhathi uMnu Nkosi ebhekene ngeziqu nalo mkhandlu ngesikhathi usaholwa nguMnu Solomon Mkhombo, lapho bekuphikiswana khona ngokuxoshwa kwakhe.
“Njengamanje simele uMnu Nkosi, ekutheni nibuyise yonke imihlomulo yakhe nomholo wakhe.
"Nencwadi enimbhalele yona yokuphela kwenkontileka yakhe, sicela niyihoxise ngoba lokhu enikwenzayo kakukho emthethweni futhi kuwukubukela phansi isinqumo senkantolo.
"Sizimisele futhi ngokulidlulisela enkantolo ePhakeme yaseMgu-ngundlovu lolu daba uma kuze kushaya umhla ka-28 (namhlanje ngoMsombuluko), lokho ninga-kwenzile,” kusho le ncwadi.
Ethintwa yiLANGA, uMnu Mdaka, uvumile ukuthi kukhona ukuxoxisana phakathi kwakhe noMnu Nkosi, wathi konke abebekukhuluma kuphakathi kwakhe (uMnu Nkosi) nomqashi wakhe.
“Ngicabanga ukuthi kumele sikuhloniphe lokho ukuthi udaba lwakhe luphakathi kwakhe nomkhandlu. Kangikwazi ukukhuluma ngalo kwabezindaba,” kusho yena.
UMnu Nkosi akatholakalanga ukuphawula njengoba ucingo lwakhe beluvaliwe ngeSonto.