ODILIKAJELE ABABILI KOWABANJWA EDLWENGULA INDODAKAZI
UGWETSHWE odilikajele ababili yiNkantolo yesiFunda yaseEstcourt ngoLwesihlanu, owesilisa owaficwa yinkosikazi yakhe eqhoqhobele indodakazi yabo, eyidlwengula eLindelani, eWeenen.
Lona wesilisa oneminyaka ewu-36 ubudala - esingeke simdalule ukuvikela ingane - wabanjwa edlwengula ingane yakhe ayizalayo kanti kuthiwa wayeseneminyaka emibili egila lo mkhuba.
Okhulumela iNational Prosecuting Authority KwaZulu-Natal, uNatasha Kara, uqinisekisile ukuthi lona wesilisa ugwetshwe odilikajele ababili ngecala aboshelwa lona ngo-2020.
“Ugwetshwe ngoLwesine ngemuva kokutholakala ukuthi wayedlwengula indodakazi yakhe kusukela ngo-2017 kuya ku-2019.
Uphinde wayidlwengula futhi ngoMfumfu (October) 2020, okuyilapho wabanjwa khona yinkosikazi yakhe eyayikade iphumile endlini yashiya umdlwenguli nengane.
Ngesikhathi ebabamba, indoda yayingaqokile, okwathi uma isibona inkosikazi yayo, yagijima yayogqoka. Yaboshwa ngaleso sikhathi, kodwa yaphika ukuthi yayidlwengula indodakazi yayo,” kusho yena.
Uqhube wathi umshushisi kule nkantolo, uNkz Nokulunga Ngcobo, okunguye obehola ubufakazi, esitatimendeni sakhe uveze ukuthi isisulu sathi sifisa sengathi kasikaze sizalwe ngoba kasiboni sizokwazi ukushintsha ukuhlukumezeka okwenzeke empilweni yaso.
Uthe: “Isisulu saveza ukuthi uyise wasihlukumeza ngendlela eyisimanga, sathi sasingakaze sitshele muntu ngoba (uyise) wayesisabisa ngokuthi uzosibulala uma sike sasho ukuthi kwenzekani." UNkk Kara uthe bayasamukela lesi sigwebo.
“Siyethemba ukuthi isigwebo esinjengalesi sizoba yisifundo kwabanye abanemiqondo efana neyakhe,” kusho yena.