UMPHATHI OMUSHA WE-DCMH NOSHINTSHO LOKUQEDA IZIKWELETU
UZIMISELE ukusebenza kanzima osethathe isikhundla sokuba yiCEO, esikhungweni esibhekelela abakhubazeke ngokwengqondo, iDurban and Coastal Mental Health (DCMH), esike saba sematheni kusolwa abaphathi baso nebhodi elisengamele ngokuxhaphaza imali, obekwenza abadinga usizo kusona bangasizakali kahle.
UMnu Mbonisi Sibisi (38), waseBhamshela, eNdwedwe, uqokwe esikhundleni sokwengamela kuqala unyaka ngemuva kokuphuma kukaMnu Lungisani Mthiyane.
Kulezi zinyanga ezintathu engenile kulesi sikhundla, uMnu Sibisi uthi kuningi asekufundile ngokuphathwa kwesikhungo esisebenzisa imali engaphezulu kuka-R50 million ngonyaka.
Uthe ubengakaze aphathe isikhundla esingaka emkhakheni wezempilo, ukuba kusona uthi kumvula amehlo. Usithathe ewazi umthwalo waso athi uzimisele ngokuwuthwala ukuze kube noshintsho.
Lesi sikhungo siphila ngokunikezelwa imali nguMnyango wezeMpilo, ngowokuThuthukiswa koMphakathi no-Sassa (okusuke kuyimali yeziguli ezisuke zigcinwe kusona ngemuva kokutholakala ukuthi sekumele ziphile ngesibonelelo).
UMnu Sibisi, uthi yize engenaso isipiliyoni esiningi kulo mkhakha, kodwa uneziqu zokumaketha nokuphatha, okumsiza ekutheni akwazi ukuqala ngokulungisa izinkinga zezikweletu ebeziba ngaphezu kwamandla.
Le nsizwa iqede umatikuletsheni eStanger High, ngo-2002, yabe isidlulela e-University of KwaZulu-Natal, yathola iziqu ze-B.Comm in Marketing and Management. Ngo-2007 isebenzele inkampani yezokumbiwa phansi, iBHP Billiton, eseRichard’s Bay, iyiMarketing Manager.
Ngo-2011 isebenzele inyunyana iNumsa ingumdidiyeli esifundeni iMgungundlovu, yashiya ngo-2015.
“Ngijoyine inhlangano engenzi inzuzo kaDkt. Zweli Mkhize, Ikusasa Le Afrika Foundation, ngibhekelele ukusebenza kwezinhlelo ezahlukene. Ngisebenzisane nalesi sikhungo (iDCMH) nehhovisi laso eliseMaoti, ngakha ubudlelwano naso.
"Noma kunjalo angikaze ngicabange ukuthi ngingagcina ngengamele lesi sikhungo,” kusho yena.
Njengoba engamele iDCMH, kumele alwele amalungelo abantu abakhubazeke ngokwengqondo (mental disabilities).
Uthi umsebenzi walesi sikhungo wukunakekela nokuvikela abakhubazeke ngokwengqondo. Bathatha abantwana abasebancane kuze kuyofika kwabaneminyaka engu-60.
“Nokukhubazeka kwehlukene kodwa thina siphakathi nendawo noMnyango wezeMpilo nalabo abakhubazekie ngokwengqondo abadinga ukunakekelwa okwahlukene. "Lapha kasinabo abaphazamiseke ngendlela yokuthi sekungathiwa bayahlanya (mentally disturbed) ngoba labo banezibhedlela abagcinwa kuzona. Thina sibhekelela abaxinekile, abanye abangenayo imindeni engababheka. Phakathi kwabo kukhona abadla amaphilisi okuwumsebenzi wosonhlalakahle bethu ukuqinisekisa ukuthi badla amaphilisi abo ngesikhathi esifanele.
"Lesi sikhungo kakusona esokuthi isiguli sizohlala kusona isikhathi eside kakhulu, kepha kungaba yisikhathi esingangeminyaka emibili nje kuphela bese sibuyela ekhaya,” kusho uMnu Sibisi.
Uthi banazo iziguli ezigcina zihlala isikhathi eside ngoba eminye imindeni iyaziyekelela, ingabe isazihlupha ngokuba nobudlelwano nazo.
"Kubalulekile ukuthi izihlobo zingabalahli abagulayo ngoba ngesikhathi begcinwe lapha, basuke bengalahliwe.
"Ukusondelana nosonhlalakahle nabahlengikazi besikhungo kuyasiza ukuthola ukuthi yini abangayenza ukulekelela isiguli ukusheshe silulame.
"Ngenhlanhla kuyacaca ukuthi abantu abaningi sebeyakwazi manje ukufuna usizo uma benezifo ezahlukene ezithinta ingqondo njengoba isikhungo sibhekelela abantu abangamaphesenti angu75 abamnyama.
“Kuqala bekufihlwa kube sengathi lowo muntu uthakathiwe kube kuwukukhubazeka ngokwengqondo. Ukubona abantu besukumela izihlobo zabo ukuba zithole usizo kusinika ithemba ukuthi sesiyazifundisa ngezifo ezinjengalezi,” kusho yena.
Phakathi kwezinto athi ufuna ukugxila kuzona njengomphathi omusha, wukubuyisa isithunzi sesikhungo, ukuzama ukwehlisa izikweletu isikhungo esibhekene nazo, wukuzama ukuqoqa iminikelo ezinhlakeni ezahlukene ukubalekelela, nokukhuthaza izisebenzi ukusebenza zizikhandle.
“Ngiyazi bekukhona izingqinamba phambilini engingeke ngiziphike kodwa-ke kubalulekile ukuthi siqhamuke nesixazululo esizosiyisa phambili. Ngeke kusasiza ukucasha ngesithupha kodwa kufuneka isikhungo senze umsebenzi waso, sinikezele ngosizo kwabaludingayo siphinde sibe ngesihloniphekile," kusho yena.
"Uma iziguli zingena esangweni lethu zisuke zizofuna usizo nokuphila, okuwumsebenzi wethu ukuqinisekisa ukuthi ziphephile, zikhathi zonke,” kusho yena.
Uthi luselude ukhalo okumele luhanjwe wuhulumeni uma kukhulunywa ngezifo zengqondo njengoba ngisho kuthulwa izinkulumo zokuyisa izwe phambili, kakukhulunywa ngemali ebekwa eceleni ukubhekelela abagula ngengqondo.
Uthi abantu abakhubazeke ngokwengqondo uma besagcinwe kulesi sikhungo, imali yabo yesibonelelo ingena kusona kuthi uma sebephilile baphume, bese imali yabo ingena ngqo kubona.
Lesi sikhungo sineziguli ezilinganiselwa ku-341, sinabasebenzi abangu-140, kuhlanganisa osonhlalakahle abawu-20 nabahlengikazi ababili.
Ezintweni uMnu Sibisi athi uzishintshile, yizivumelwano nezinkontileka ebezifaka isikhungo ezikweletini, ukuqashwa kwaso (security), abaphekayo nokunye.