Simfisela inhlanhla uTruter ozobamba kwesomqeqeshi
AMAZULU FC aqoke uBrandan Truter ukubamba isikhundla esivuleke emuva kokuba ehlukane noBenni McCarthy ngeledlule kuze kuba aqasha umqeqeshi ngokugcwele.
Simfisela inhlanhla uTruter (oke waqeqesha iSwallows FC neBay United).
Izindaba zokuhamba kukaBenni ziqinisekiswe ngumengameli wamaZulu, uSandile Zungu ngoLwesihlanu emini.
UBenni wajoyina uSuthu njengomqeqeshi oyinhloko ngoZibandlela (December) ka-2020, ethatha ku-Ayanda Dlamini owayepheka le kilabhu ngaleso sikhathi.
Wafika kwazakala oSuthwini njengoba lwaluyibambe ngasemsileni kwi-log yeDStv Premiership, walubeka endaweni yesibili ngokuphela kwesizini.
Lo mqeqeshi waphinde wahola AmaZulu kwiCaf Champions League aze afika esigabeni samaqoqo kulo mqhudelwano oqhatha amaqembu aphambili e-Afrika.
Noma kunjalo, kuyiqiniso elingenakuphikwa ukuthi kasiyiqalanga kahle neze le sizini kwiligi.
AmaZulu kawakanqobi ngisho nowodwa umdlalo weligi selokhu kwaqala lo nyaka futhi sakhishwa ekuseni kwiNedbank Cup.
Kumanje nje iNyokan’ Eluhlazana ihleli endaweni yesishiyagalolunye kwi-log yeDStv Premiership ngamaphuzu awu-29 emidlalweni ewu-23.
USuthu - oseluwine imidlalo eyisihlanu lwahlulwa kwemine kwiligi - seluphenduke ochwepheshe bama-draw kule sizini.
Emidlalweni ewu-23 esesiyidlalile, ewu-14 iphele zibambene.
Emdlalweni wamaZulu wokugcina noBenni engumqeqeshi - esikhathini esingaphansana kwamasonto amabili adlule - sadliwa yiRaja Casablanca yaseMorocco ngo-2-0. Bekungokokuqala emidlalweni ewu-15 ukuthi uSuthu lushayelwe ekhaya. Ngaphambi kwalo mdlalo, AmaZulu abengakaze ashayelwe ekhaya kusukela ngoMandulo (September) ka-2021.
Le miphumela iyakhombisa ukuthi lukhona uguquko obesekufanele lwenzeke ukuze kuthathwe ikilabhu ibekwe esigabeni esilandelayo.
Kufanele kukhumbuleke ukuthi mhla uZungu ethatha izintambo zokuphatha leli qembu ngoMfumfu (October) ka-2020, wakubeka kwacaca ukuthi inhloso yakhe wukuthi libalwe namane amakhulu eNingizimu Afrika. Abantu kufanele babone ukuthi kasiwona umlilo wamaphepha.
Sizolwela ukufa nokuphila kusukela manje kuze kube sekupheleni kwesizini ukuze sibuyele endaweni yesibili, yesithathu noma eyesine-ke okungenani ngoba yilapho esizibona sifanelwe wukuba khona. Mangikugcizelele-ke kodwa ukuthi ukuhamba kukaBenni akusikhona okwamagqubu.