Izinguquko kwiBafana Bafana ezobhekana neFrance
UBroos uthi sebevuthiwe abadlali bezakhe
UTHEMBISA izinguquko azibona zizomunika injabulo uHugo Broos ongumqeqeshi weBafana Bafana ezobhekana neFrance emdlalweni wobungani kusasa ngoLwesibili ngo21h15 eLille, eFrance.
IBafana iya kulo mdlalo nje, idlale ngokulingana neGuinea kuba wu-0-0 kowobungani ngoLwesihlanu kusihlwa, eBelgium.
UBroos utshele abezindaba ukuthi kunezinguquko azozenza koweFrance ngoba wumdlalo omkhulu, kwazise bazokube bebhekene nezingqwele zeNdebe yoMhlaba.
Uthe ngale midlalo ufuna ukubona kahle ukuqina kokhakhayi kubo bonke abadlali ukuze akwazi ukuhlelela imidlalo yokuhlunga ye-Africa Cup of Nations Cup (Afcon), ezoqala ngoNhlangulana (June).
Yize ethi ngeke lube lukhulu ushintsho, kodwa uhlela ukunika ithuba uNyiko Mobbie ogijima kwiSekhukhune United noLyle Lakay oshoshelayo kwiMamelodi Sundowns.
Uveze ukuthi kuvunguza umoya wobunye ekhempini, ezeseka ngokuthi akayena umqeqeshi ophatha abadlali ngesandla sensimbi okwamasosha.
“Indlela abazwana ngayo abadlali ekhempini, iyamangalisa.
"Uma kukhona owenza iphutha, bakhuzana bebodwa, kakudingi ukuthi ngize ngiqinise imithetho. Kufanele abadlali ubanike ithuba lokuziveza ngendlela enenhlonipho ukuze bakwazi ukuza kuwena uma kukhona okungahambi kahle ensimini. Kufanele bazi ukuthi yini esiyidingayo.
“Umdlalo wethu neFrance kawulula, udinga amadoda aqinile ukumelana nezitha.
"Phela iFrance idlala ibhola elisheshayo.
"Ngiyabethemba abadlali bami ukuthi sebevuthiwe emqondweni ukubhekana nomdlalo omkhulu ngalolu hlobo,” kusho uBroos.
Kafushane ngomlando weBafana neFrance:
France 2, SA 1 (kowesihle 11/10/1997) France 3, SA 0 (kwiNdebe yoMhlaba 12/06/98)
SA 0, France 0 (kowobungani) 07/10/2000)
SA 2, France 1 (kwiNdebe yoMhlaba 22/06/2010)