KUPHELA AMAPHUPHO NGAMAZWE AZOMELA I-AFRIKA KWEYOMHLABA
UBHEKWE ngabomvu umlenze wokugcina womdlalo weNigeria neGhana ozokuba kusasa ngoLwesibili ngo-19h00 e-Abuja, eNigeria, wokuhlungela iNdebe yoMhlaba yeFifa ezokuba ngasekupheleni konyaka eQatar.
La maqembu abambane ngo-0-0 ngoLwesihlanu kusihlwa eGhana.
Emdlalweni wangoLwesihlanu, iGhana ibizenzela kwiSuper Eagles, kodwa yashoda ngenhlanhla yokukwazi ukubhakuzisa inethi. Yiyona eyakhe amathuba amaningi kwasiza ukuphaphama kukanozinti weSuper Eagles, uFrancis Uzoho.
Nakuba lo mdlalo uphele ingekho egobe uphondo, kodwa iNigeria ikhalile ngonondweba uRedouane Jiyed ngesinqumo sakhe sokukhomba ibhola emlotheni wabuye wajika emuva kokubuka iVideo Assistant Referee (VAR).
Kubhekwe ukuba lo mdlalo ushube njengoba la mazwe angomakhelwane, eyizimbangi ezinkulu.
U-Augustine Eguavoen - owake wadlala eqenjini lesizwe laseNigeria - ocija iNigeria, uzwakalise ukujabula ngomphumela womdlalo odlule, ezeseka ngokuthi iGhana kakulona iqembu okumele lithathwe kalula, ngoba liyingozi.
U-Otto Addo ololonga iGhana, uncome abadlali bakhe nakuba benze amaphutha emdlalweni odlule, wathi konke sekulele kubo ukuyisa iGhana eQatar.
I-Afrika inezikhala eziwu-5 kwiNdebe yoMhlaba, kanti zizovaleka emuva kwemidlalo yakusasa sekugijinywa imilenze yesibili.
Imiphumela yemilenze yokuqala ebingoLwesihlanu imi kanjena: Ghana 0, Nigeria 0; Cameroon 0, Algeria 1; Egypt 1, Senegal 0; Mali 0, Tunisia 1; DR Congo 1, Morocco 1.
Imilenze yesibili yokuhlungela ukungena kwiNdebe yoMhlaba yamazwe ase-Afrika imi kanje, iqembu elisekuqaleni lidlalela ekhaya: KUSASA NGOLWESIBILI
Nigeria vs Ghana 19h00.
Senegal vs Egypt 19h00.
Morocco vs DR Congo 21h30. Algeria vs Cameroon 21h30.
Tunisia vs Mali 21h30.