Ukugijima kumzuzise umfundaze wase-USA
Ukhuthaza intsha ukuzinikela kukho konke ekwenzayo
UGQUGQUZELA ozakwabo ukuba bazimisele kwabakwenzayo uFezile Thango (18), wePhantane Athletics Club - kaMdu Khumalo - othole umfundaze wokuyoqhuba imfundo yakhe eColdy College, e-United States of America (USA).
UFezile utshele ILANGA ukuthi ujabule kakhulu ngokuthola lo mfundaze kwazise uzokwehlisa umthwalo emahlombe abazali bakhe.
Kumanje lo msubathi wenza uGrade 11 eNtongande High School, eRichards Bay.
Kuzokuthi uma eqeda uGrade 12 akhukhule alibhekise e-USA ukuyokwenza iziqu seSport Science.
Uthi uthole lo mfundaze ngosizo lukaKhumalo, obekuthi njalo uma bejima athathe izithombe nezithombemnyakazo (videos) zakhe azifake ezinkundleni zokuxhumana.
“Ngithe ngizihlalele ekhaya, ngathola ucingo luphuma kuBrand Johnson wakulo leli kolishi engitshela ukuthi uchazekile ngendlela engigijima ngayo.
Ucele ukuba ngimxhumanise nabazali bami, baxoxa bavumelana ngokuthi uma ngiqeda uGrade 12 amabombo ngiwabhekisa e-USA.
“Ngibonga kakhulu uKhumalo ngokungisiza. Ukuba akawenzanga la ma-video, bengingeke ngiluthole lolu sizo.
"Imali yokuya ezikhungweni zemfundo ephakeme seyinkulu kakhulu manje, ukuthola kwami uxhaso kuzowusiza kakhulu umndeni wami.
“Okungijabulisa kakhulu wukuthi lapho engiya khona, kukhona uSanele Masondo ongomunye wabagijimi engibaziyo,” kusho uFezile.
Ukhuthaze intsha ukuba izimisele ezintweni ezenzayo.
“Kumele intsha yazi ukuthi ukuzihlanganisa nento ethile ephusile, kungayivulela amathuba amahle empilweni.
"Mina kangikaze ngiphuphe ukuthi ngiyoke ngiyofunda phesheya kwezilwandle, nokho ngokugijima nje kukodwa, sengithole ithuba elikhulu kangaka,” kusho uFezile.
UFezile wenza u-800m no-1500m kanti ngeledlule ubeyingxenye yeqembu laKwaZulu-Natal ebeliye emidlalweni kazwelonke yamahigh school eGoli.
UZenzile ongunina kaFezile, uthe ujabule kakhulu ngomfundaze otholwe yindodakazi yakhe.