IZINGQINAMBA KWABEKILABHU EVUNDULULA ABAGIJIMI
ULANDA ngokungena kwezokugijima uJessica Khomo ongumdlali webhola lomnqakiswano, oyibamba kwiKingdom Stars yaKwaZuluNatal, njengoba ngo-2018 esungule uMgababa Development Athletics Club.
Uthi inhloso yakhe enkulu wukuvundulula nokuthuthukisa amakhono entsha kwezokusubatha, ingabi wuvanzi emigwaqweni okungaholela ekutheni igcine ingene ezidakamizweni, ebugebengwini nasekutholeni izingane ezingahlelelwe.
Le kilabhu yalo mdlali odabuka eMgababa, ingaphansi kweKwaZulu-Natal Athletics (KZNA), wayisungula ehlangene namanye amalungu omphakathi wakule ndawo.
Igxile ezinganeni ezincane kanti yenza kahle kakhulu yize isacathula ngoba sekukhona abasubathi bayo asebeke bamela iKwaZuluNatal emidlalweni kazwelonke.
Phakathi kwabasubathi abenza kahle kuMgababa AC, kukhona uMpilo Khomo osanda kubuya nendondo yegolide kwi-600m, uKhwezi Ndulini owenza kahle kwi-cross country, uSmiso Khomo, uSiyanda Dangazela abangabanye babasubathi asebeke bamela iKwaZuluNatal emidlalweni eyahlukela.
Ekhuluma neLANGA uJessica, uthe okubenze basungula ikilabhu yezokugijima wukuthi bafuna ukuqoqa intsha ukuze ingabi wuvanzi.
Uthi ukungena kwakhe kwezokugijima kakusho ukuthi akaseyona ingxenye yebhola lomnqakiswano.
“Isikhathi esiphila kusona sinzima, isiZulu sithi zibanjwa zisemaphuphu.
"Inhloso yethu wukushintsha indlela intsha ephila ngayo kulesi sikhathi samanje. Uma kungekho into eyenzayo, lokho kungaholela ekutheni igcine isiyizigebengu, idla izidakamizwa, kutholakale nezingane ezingahlelelwe.
"Inhloso yekilabhu wukusiza intsha, siyinike ithemba ngempilo,” kusho uJessica.
Uqhube wathi banezingqinamba eziningi ekilabhini.
Izinkinga ezinkulu ababhekene nazo wukushoda ngamateki okugijima, yindawo yokuziqeqesha njengoba kungekho ngisho inkundla eyodwa eMgababa, yimoto yokuthutha izingane uma ziyogijima, yimifaniswano yokugijima nokunye.
Ngaphandle kokudlalela iKingdom Stats, uJessica useke waba yingxenye yeqembu lesizwe laseNingizimu Afrika, iSpar Proteas.
ULindo Mthembu obambisene noJessica kule kilabhu, uthe kabahlosile ukugxila kwezokugijima kuphela, ziningi izinhlelo abaphezu kwazo.
Uthe bafuna ukufaka nabadlali bebhola lomnqakiswano, ababhukudi neminye imidlalo ukuqinisekisa ukuthi kayikho intsha esala ngaphandle, igcine isidukela ezintweni ezingalungile.