Seyiqala ukugwema ingcindezi iDowns
Ifuna ukubuya nomphumela omuhle koweCaf e-Angola
KUNCONYWA ukusebenza ngokuzikhandla kukaPeter Shalulile (osesithombeni) ongumgadli weMamelodi Sundowns enenebule iLamontville Golden Arrows ngo-6-0 emdlalweni weDStv Premiership ngoLwesibili ntambama eLoftus Stadium, eTshwane.
Lo mdlali uvalele amagoli amathathu kanti amanye ashaywe nguGaston Sirino, uKermit Erasmus noPavol Safranko.
UManqoba “TV” Mngqithi ongumqeqeshi weDowns, uthi amathuba afika kahle kuShalulile ngoba usebenza kanzima ukuqinisekisa ukuthi ikilabhu iyadlondlobala.
“UShalulile unikela ngenhliziyo yakhe yonke ekilabhini. Ngicabanga ukuthi lokhu yikhona kanye okumenza avalele ngale ndlela amagoli.
"Abadlali bethu uma bephethe ibhola bacinga yena ngoba bayazi ukuthi umqondo wakhe uhlale ucabanga ukubhakuzisa inethi.
"Uyakwazi ukubambisana kalula nozakwabo okwenza izinto zenzeke kalula lapha ekilabhini,” kusho uMngqithi.
Uthi weneme ngendlela ezakhe ezihlangene ngakhona.
“Kumele sibancome abadlali ngalokhu abasinika khona. Bakhombisa ukulambela impumelelo ngaso sonke isikhathi. Lokhu sikubone ngokuthi bashaye amagoli amathathu ngaphambi kokusongwa kwesiwombe sokuqala,” kusho lo mqeqeshi
Nokho walile ukuphawula ngamathuba okunqoba zonke izinkomishi abaseyingxenye yazo.
IDowns inqobe iMTN8 ngokuqala kwesizini kanti seyivule igebe lamaphuzu awu-14 esicongweni selog yeDStv Premiership.
Ngaphezu kwalokhu, ingene esigabeni sama-semi final eNedbank Cup ekubeni ikuma-quarter final eCaf Champions League.
Iqhathwe nePetro de Luanda yase-Angola kulo mqhudelwano ngoMgqibelo ngo-18h00 ekuhambeni. IDowns ibhekwe ukudlula kule kilabhu engenawo umlando onothile ebholeni lase-Afrika nxa iqhathaniswa nayo.
UMngqithi uthi ukwenza kahle kwabo kulezi zinsuku kakuchazi ukuthi sebezowola zonke lezi zinkomishi abasazidlalela. Nokho kubukeka esegwema ingcindezi njengoba phambilini wakuveza ukuthi bangakujabulela ukuzinqoba zonke ekhuluma neLANGA.
UShalulile wephule irekhodi likaSiyabonga Nomvethe lokuvalela amagoli awu-20 ngesizini eyodwa. UShalulile uhamba phambili ngokuvalela amagoli angu-21 kwiligi.