KUXHASE UMASIPALA KOTHATHWE YIZIKHUKHULA
KUSIZE induna yeSilo kujame konke emndenini wakwaShongwe, eMahhashini, KwaNongoma ungazi ukuthi uzothathani uhlanganise nani ukuze kufihlwe indodana yawo eshone ngenxa yezikhukhula ezinamandla ezihlasele eThekwini ngeledlule. Kulo mndeni wakwaShongwe kushone uMnu Bongumusa Shongwe (28).
Induna yeSilo uMnu Mthokozisi Ndwandwe, kuthe uma izwa usizi lomndeni, yaphuma ingena ingqongqoza yasizwa wuMasipala wesiFunda iZululand, osukumele phezulu, wathi uzothwala zonke izindleko zomngcwabo.
Ekhuluma neLANGA umfowabo kamufi uMnu Sikhumbuzo Shongwe, uthi umfowabo uzunywe wukufa wacindezelwa wudonga lwendlu abehlala kuyo eClermont, engadlali nomasingcwabisane njengoba ubebamba amatoho emalolini adiliva impahla.
“Ziyime emthumeni nje kuthina singazi ukuthi uzolandwa kanjani, angcwatshwe ngani, kanti induna izoluveza usizo, yasikhulumela nomasipala. Kumanje siphuma ukuyobonga emzini wayo ngoba ngaphandle kosizo lwayo umasipala ubungeke wazi ngathi.
“Ubaba uneminyaka ewu-81, uziphilisa ngempesheni akasakwazi nokuhamba njengoba esebenzisa isihlalo, umama wayebamba amatoho kudala akekho osebenza into engcono. Sibuyelwe yithemba sithola usizo, kumanje silindele isidumbu sikamfowethu esizolethwa ngabakwa-Avbob kusasa ngoLwesihlanu bese simfihla ngoMgqibelo,” kusho uMnu Shongwe.
Imeya kaMasipala wesifunda iZululand, uMfu Thulasizwe Buthelezi, ithi umasipala uzozithwala zonke izindleko zomngcwabo kaBongumusa Shongwe.
“Sizwelana kakhulu nomndeni wakwaShongwe. Sinqume ukuthi sizithwale zonke izindleko zomngcwabo ukuze uBongumusa aphelezelwe ngesizotha.
“Sizokhipha ukudla kwabantu abangu-300, itende nezihlalo. Sizophinde sibakhalise ngoR20 000 wokuthenga ukudla, sibanike nenkomo yokumphelezela. Sikholwa wukuthi lokhu kuzowuthoba amanxeba umndeni, kwethule nomthwalo obusemahlombe abo. Imizamo yokuthola induna Ndwandwe iphunzile njengoba ucingo lwakhe belungangeni.