IMEYA NOHLELO LOKWAKHELA ABALINYALELWE YIMIZI NGOZAMCOLO
IVULE izandla kosomabhizinisi imeya yaseKing Cetshwayo ekuxhasweni kwemindeni esele dengwane ngaphansi kwalesi sifunda ngenxa yezikhukhula okuthiwa zishaye kwezwela nakule ndawo.
Imeya yalo masipala uMnu Thamsanqa Ntuli, ithi ingaphezulu kuka-240 imindeni engenayo indawo yokufihla amakhanda kule ndawo kuhlanganisa uMhlathuze, iMfolozi noMlalazi.
Ithi njengamanje umasipala uphezu kwemizamo yokwakhelwa kwemindeni izindawo zokuhlala. Iveze nokuthi kushone abane kule nhlekelele kodwa imindeni eminingi isele phandle nakuba ingahambanga nezikhukhula.
Imeya iqale umkhankaso wokuhambela lezi zindawo ezinemindeni elahlekelwe kusukela ngoLwesibili, iphelezwa imeya yaseMhlathuze uMnu Xolani Ngwezi, behlola isimo okubalwa nokuxhasa ngezijumbana zokudla kwabaswele.
Ithi basebenza ngokusemandleni ukulekelela bonke abaxakekile ngenxa yalesi simo esenzekile.
“Imindeni ewu-100 kuthinteke imizi yayo kodwa eminye ibivele ingenazo izindawo, kuhambe konke. Njengamanje sizama uxhaso lokuthi bakhelwe izindawo zokuhlala. Lokhu okwenzekile kufanele sibambisane kukhona ngoba uhulumeni womasipala basekhaya unemali encane kakhulu ebhekelele izinhlekelele.
“Sizimisele ukuqinisekisa ukuthi laba abakhahlamezekile ngaphansi komasipala bethu banakho ukudla, amanzi nendawo yokufihla amakhanda.
“Indlela esizosingatha ngayo uhlelo lokwakhelwa kwabantu izindawo zokuhlala, izobhekelelwa yihhovisi likamenenja wethu ngenhloso yokuqinisekisa ukuthi konke kuhamba ngendlela eqondile, enobulungiswa. Abanesifiso sokwelula isandla bangasondela kumasipala ukuze kubanjiswane,” kusho uMnu Ntuli.
Uthi lezi zimvula zilimaze kakhulu ingqalasizinda yamanzi ezindaweni ezingaphansi kwalo masipala, okwenze kuphazamiseke nokusabalala kwawo kwezinye izingxenye.
Uthi phakathi kwezinto ezibalulekile ukuthi kulezi zindawo eziphazamisekile ezingenawo amanzi zihanjiselwe.
Indawo yaseKing Cetshwayo, ibalwa nezindawo ezithintekile kule nhlekelele njengoba uNgqongqoshe wezeMfundo uNkk Angie Motshekga evakashele izikole zakhona ngoLwesithathu, okubikwa ukuthi nazo zilimele.