Badumele ngokudunwa kwemoto kadokotela osiza elokishini
Amalungu omphakathi anxenxa izakhamizi zaseMlazi ukuba zingabuvumeli ubugebengu
AMALUNGU omphakathi esigcemeni sakwa-V, eMlazi akhombise ukukhathazeka ngesenzo esenziwe yizigilamkhuba, kuhlaselwa udokotela abathi usefana nelungu lo mphakathi njengoba ephinde abe nosizo kubona.
Lesi sigameko senzeke ngoMsombuluko ngaphandle kwehhovisi lakhe lo dokotela, lapho ekhonjwe khona ngezibhamu yizigebengu ezimbili, zamkhipha emotweni yakhe yohlobo lwe-Mercedes Benz i-C 180 Kompressor ka-2017, zashaya zachitha nayo.
UDkt Aboo Baker, usesebenze kule ndawo iminyaka engaphezulu kwewu-32, esebenza nomphakathi waseMlazi namaphethelo. Yize noma engalimalanga kodwa uthi lesi senzo simphule inhliziyo ngoba impilo yakhe yonke yobudokotela usebenze nabantu baseMlazi namaphethelo. Uthi yize noma bese kukhona emqondweni ukuya empeshenini kodwa uneziguli angeke akwazi ukuzishiya ngoba zithembele kuyena.
Ekhuluma neLANGA, ubezwakala ukuthi uphoxekile ngalesi sigameko njengoba ethi kule minyaka ewu-32 esebenza kuleli lokishi akakaze azizwe engaphephile njengoba ethi akanqeni ukuphuma ngo-8 ebusuku uma esegoduka.
“NgoMsombuluko ngingene emotweni ngathi ngihlala phansi nje, kwaqhamuka umfana obeke isibhamu esifubeni, wathi mangiphume. Ngivele ngaxakeka ukuthi bafunani, ngathi okungenani ngicela ukuthatha isikhwama ngoba besinamafayela ezinye iziguli, izincwadi zokushayela, umazisi nesikhwama semali. Ngibacele ukuthi bangikhiphele lesi sikhwama noma amafayela, bangangiphendula,” kusho yena.
“Ngiyacabanga ukuthi bona bebecabanga ukuthi imoto yintsha kanti yimoto endala. Kuthe noma sebehamba ngayo bacishe bashayisa unogada obekhona. Ngidumele kakhulu ngalesi senzo, kodwa lokho kakusho ukuthi ngizobe sengivala amahhovisi ami lapha eMlazi.
“Mina ngingudokotela, kangiyena usomabhizinisi ngineziguli ezingaphezulu kuka-20 ezazalwa zinegciwane lesandulela ngculaza esezineminyaka engaphezulu kwewu-30 ngizinakekela. Uma ngingahamba lapha labo bantu bazokwenzenjani?” kusho yena.
Uthi lesi sigameko senza umndeni wakhe ukhathazeke ngaye kodwa akazimisele ukuvala indawo asebenzela kuyona njengoba ethi le ndawo iyohlala iwumlando wakhe nomsebenzi omuhle awenzela abantu baseMlazi.
Unxuse abangaba nomkhondo ngalezi zigilamkhuba ukuba baxhumane namphoyisa aseGG.
Ilungu lomphakathi okuyilo elixhumane neLANGA ngalesi sigameko, lithe badumele kakhulu ngalesi senzo, lithi akekho umuntu wakuleli lokishi ongawazi amagalelo kaDkt Baker.
UMnu Sipho Khanyile, uthi useneminyaka engaphezulu kweyishumi ehamba lo dokotela nophinde alekelele abantu abangenayo imali uma begula.
“Lo ngudokotela onendaba nabantu bakithi abamnyama. Ngisho nangesikhathi sokhuvethe wayekhona lana njengoba eke naye wagula kodwa ubesinda abuyele emahhovisi
akhe.
“Siyacela kubantu baseMlazi ukuthi kube yithi esivikela abantu abanjengaye,” kusho uMnu Khanyile. Okhulumela amaphoyisa KwaZuluNatal, uLt-Col Nqobile Gwala, usiqinisekisile lesi sigameko, wathi bekungakaboshwa muntu futhi nemoto kadokotela beyingakatholakali.