AMANYE AMACALA KOWAYETHENGELA IZIHLOBO IZINKABI NGENXA YOMSHWALENSE
UZOBUYELA enkantolo enyangeni ezayo uRosemery Ndlovu (osesithombeni), okuyimanje udonsa isigwebo ngamacala ahlukene, athinta ukuthengela izihlobo zakhe izinkabi ukuze akwazi ukuthola imali yomshwalense.
UNdlovu, okuyimanje udonsa isigwebo sodilikajele abayisithupha, ubevele enkantolo kaMantshi eKempton
Park, eGoli, izolo ngoLwesithathu, ngamanye amacala amabili angahlangene nalawo asegwetshelwe wona.
Ecaleni lokuqala, usolwa ngokukhokhela inkabi imali ukuze ibulale umseshi nomphathi wakhe, njengoba kuthiwa wayebagxeka ngokuboshwa kwakhe nangokubhekana kwakhe namacala okubulala.
Ecaleni lesibili, usolwa ngokubopha itulo nomunye umngani wakhe, naye oyiphoyisa njengaye, uNkk Nomusa Mudau, ukuba abulale umyeni wakhe, naye owayeyiphoyisa eNorkem Park.
UNkk Mudau naye ubhekene naleli cala elifanayo.
Ngesikhathi uNdlovu ehlanganisa leli itulo, ubesebenza esiteshini samaphoyisa eTembisa.
Imithombo iveza ukuthi uNdlovu ubejwayele ukuthenga izinkabi kwelinye lamahostela akhona ngoba ube-nabantu abaningi abaziyo khona.
Enkantolo ngoLwesithathu, uNdlovu ubonakale ezimisele ngendlela eyisimanga, eziphophothile ebusweni, wafaka nezinkophe. Ngesikhathi kukhulunywa ngamacala lawa, ubebonakala engahlangene nje nokukhulunywayo, kodwa wabuza ukuthi la macala kuthiwa wawenza nini. Amacala amabili abhekene nawo ngamabili okuzama ukubulala ahlanganisiwe, nelokubopha iculo lokubulala. Elesibili ababhekene nalo nomngani wakhe uNkk Mudau, ngelokubopha itulo lokubulala. UNkk Mudau, okuyimanje ukhulelwe futhi kuvele ukuthi angabeletha noma kunini, ukhishwe ngesexwayiso.
UNdlovu utshele imantshi ukuthi utshelwe ngoLwesibili ukuthi udingeka enkantolo, ngakho-ke akazange abe nesikhathi esanele sokuthi athole ummeli.
Icala lihlehlele umhla ka-25 enyangeni ezayo ukuze akwazi ukuthola ummeli.
Okhulumela i-NPA, uPhindi Mjononwane unqabile ukukhuluma ngaleli cala, wathi yonke imininingwane izovela uma seliqulwa.