KUJUTSHWE ABAZOBHEKA UMONAKALO KOWEZEMPILO
UNGQONGQOSHE wezeMpilo kuzwelonke, uDkt Joe Phaahla, usejube ithimba elizobheka umonakalo ezikhungweni ezehlukene zezempilo ukuthi ungakanani kulandela izikhukhula ezishiye kukhalwa esifundazweni iKwaZulu-Natal.
Zingaphezu kuka-455 izidumbu esezitholakale kanti kunezinkulungwane zemindeni ezisale dengwane ngemuva kokukhukhuleka kwemizi yazo.
Izolo ngoLwesithathu uDkt Phaahla, uveze ukuthi sezingaphezulu kuka377 izidumbu ezisehlonziwe kanti ezingaphezulu kuka-50 zisalindele ukuthi zihlonzwe.
Uthe njengoba ejube ithimba nje, yingoba kufanele kusheshe kutholakale ukuthi mungakanani umonakalo owenzeke ezikhungweni zabo, yikhona bezokwazi ukusheshe bahambise usizo olufanele.
Ngokolwazi abanalo uthe sebethole ukuthi kunezibhedlela ezidinga ukuthi zilungiswe uphahla, phakathi kwazo ubale iNewtown Community Health Centre, yisibhedlela iWentworth, yiG.J.Crookes, neJustice Gizenga Mpanza.
I-Newtown Health Centre uthe kumile ukusebenza kwayo ngenxa yomonakalo.
“Phakathi kwezikhungo ezikhahlamezekile zilinganiselwa ku-23, izibhedlela ibe wu-34 imitholampilo kanye nama-community health centre izibalo zawo ezingaqinisekiswanga.
Umonakalo omkhulu wenziwe ngamanzi ashiye uphahla lu-thambile nokwenza lube yingozi,” kusho yena.
Uveze ukuthi lamathimba abawathumele ukuba ayobheka umonakalo ukuthi ungakanani, azohambela izindawo okubalwa kuzona iTheku, Ugu, Ilembe, uMgungundlovu, iKing Cetshwyo noMkhanyakude.
Izikhukhula ziqale ukwenza umonakalo ezindaweni ezahlukene esifundazweni, ngasekuqaleni kwesonto eledlule kanti namanje sisalokhu siqhubekile nokukhuphuka isibalo sabashonile njengoba usuku nosuku kunezidumbu ezitholakalayo.
Umonakalo ushiye ingqalasizinda ikhahlamezekile okuhlanganisa imigwaqo ebeyibhidlikile, nokuqhuma kwamapayipi amanzi nokushiye izindawo eziningi zingenawo amanzi nogesi.